دریائے چناب میں ہیڈ خانکی اور ہیڈ قادر آباد پر پانی کے بہاؤ میں کمی ،تاہم صورتحال اب بھی خطرناک

دریائے چناب میں ہیڈ خانکی اور ہیڈ قادر آباد پر پانی کے بہاؤ میں کمی آنا شروع ہوگئی تاہم صورتحال اب بھی خطرناک ہے۔

 ہیڈ خانکی پر پانی کا بہاؤ ساڑھے 10 لاکھ کیوسک سے کم ہو کر 9 لاکھ 5 ہزار کیوسک پر آ گیا جبکہ ہیڈ قادر آباد پر بھی غیر معمولی سیلاب اور پانی کا بہاؤ 10 لاکھ 45 ہزار 601 کیوسک ہو گیا۔

ادھر دریائے ستلج پر گنڈا سنگھ والا کے مقام پر پانی کا بہاؤ 2 لاکھ 61 ہزار کیوسک سے زائد ہے اور غیر معمولی سیلاب ریکارڈ کیا جارہا ہے، ہیڈ مرالہ پر اونچے درجے کا سیلاب ہے جہاں پانی کا بہاؤ 2 لاکھ 40 ہزار لاکھ کیوسک ہے جبکہ دریائے راوی میں بلوکی اورستلج میں سلیمانکی پر درمیانے درجے کے سیلاب ہیں۔

اس کے علاوہ دریائے چناب میں ہیڈ خانکی اور قادرآباد کے درمیان آئندہ 12سے 14 گھنٹوں میں بہاؤ کی شدت برقرار رہنےکا امکان ہے۔

دوسری جانب میڈیا بریفنگ میں چیئرمین این ڈی ایم اے لیفٹیننٹ جنرل انعام حیدر نے بتایا کہ پنجاب کے سیلاب سے متاثرہ علاقوں سے 2 لاکھ10ہزار افرادکو محفوظ مقامات پر منتقل کیا گیا، جس میں پاک فوج، رینجرز، ریسکیو 1122 اور  پی ڈی ایم اے پنجاب نے حصہ لیا۔

انہوں نے کہا کہ آئندہ دنوں میں دریائے ستلج کی قریبی آبادیوں کو محفوظ مقامات پر منتقل کرنےکی ضرورت ہے، فیلڈ مارشل کی ہدایات پر تمام متعلقہ فارمیشنز دیگر اداروں سے مل کر امدادی سرگرمیوں میں مصروف ہیں۔

واضح رہے کہ مون سون بارشوں کا نیا اسپیل 29 اگست سے 9ستمبر تک جاری رہےگا، حالیہ مون سون میں ملک بھر میں804 افراد جاں بحق ہوئے اور ایک ہزار سے زائد زخمی ہوئے۔