روس کےیوکرینی دارالحکومت کیف پر ڈرون اور میزائل حملے، 18 افراد جاں بحق،متعدد زخمی

کیف:روسی افواج نے یوکرینی دارالحکومت کیف پر بڑے پیمانے پر ڈرون اور میزائل حملہ کردیا جس میں 18 افراد جاں بحق جبکہ درجنوں زخمی ہوگئے۔

غیر ملکی میڈیا رپورٹس کے مطابق یوکرینی صدر زیلنسکی کا کہنا ہے کہ دارالحکومت کیف پر گزشتہ رات ہونے والے روسی حملے میں 2 بچوں سمیت 18 افراد جاں بحق جبکہ 38 زخمی اور 7 اضلاع میں رہائشی اور دیگر عمارتوں کو نقصان پہنچا ہے۔

میڈیا رپورٹ کے مطابق یوکرینی فضائیہ نے کہا کہ کریملن نے رات بھر میں 598 ڈرونز اور 31 میزائلوں سے حملہ کیا، فضائیہ کے ترجمان یوری اِہنات کے مطابق یہ یوکرین پر ہونے والے ’سب سے بڑے حملوں میں سے ایک‘ تھا۔

دوسری جانب یوکرینی صدر وولودیمیر زیلنسکی نے اس حملے کو ’شہریوں کا دانستہ قتل عام‘ قرار دیا، ایک بیان میں انہوں نے کہا کہ ’یہ روسی میزائل اور ڈرون حملے اُن سب کے لیے جواب ہے، جو ہفتوں اور مہینوں سے جنگ بندی اور حقیقی سفارت کاری کی اپیل کر رہے ہیں‘۔