ایرانی صدر کا سیلاب متاثرین سے اظہارِ یکجہتی، پاکستان کو ہر ممکن مدد کی پیشکش

ایرانی صدر مسعود پزشکیان نے پاکستان میں حالیہ سیلاب کے باعث ہونے والے جانی و مالی نقصان پر گہرے دکھ اور افسوس کا اظہار کیا ہے۔ انہوں نے اس سلسلے میں وزیراعظم شہباز شریف سے ٹیلی فونک رابطہ کیا اور متاثرہ خاندانوں سے یکجہتی کا اظہار کیا۔

گفتگو کے دوران ایرانی صدر نے پاکستان کو مشکل وقت میں ہر ممکن تعاون کی پیشکش کرتے ہوئے کہا کہ ایرانی عوام دکھ کی اس گھڑی میں پاکستانی بھائیوں کے ساتھ کھڑے ہیں۔

وزیراعظم شہباز شریف نے ایرانی صدر کے ہمدردی اور تعاون کے پیغام پر شکریہ ادا کرتے ہوئے سوشل میڈیا پر بیان میں کہا کہ ایران کی حمایت اور یکجہتی پر مشکور ہوں۔

وزیراعظم نے مزید کہا کہ وہ چینی شہر تیانجن میں ایس سی او سربراہ اجلاس کے دوران ایرانی صدر سے ملاقات کے منتظر ہیں، اور ساتھ ہی ایران کے سپریم لیڈر کے لیے نیک تمناؤں کا پیغام بھی پہنچایا۔