پی ڈی ایم اےکی خیبرپختونخوا میں بارشوں اور سیلاب کے باعث نقصانات کی رپورٹ جاری

پرووینشیل ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا کے مختلف اضلاع میں بارشوں، اربن اور فلش فلڈ کے باعث نقصانات کی رپورٹ جاری کردی ہے۔ جس کے مطابق صوبے میں اب تک مختلف حادثات میں 411 افراد جاں بحق جبکہ 258 زخمی ہوگئے۔

پی ڈی ایم اے کے مطابق 15 اگست سے اب تک بارشوں اور فلش فلڈ کے باعث اب تک مختلف حادثات میں اموات کی مجموعی تعداد 411 ہوگئی اور 258 افراد زخمی ہوئے جب کہ مجموعی طور پر 3580 گھروں کو نقصان پہنچا ہے۔

جاں بحق ہونے والوں میں 305 مرد، 56 خواتین اور 50 بچے شامل ہیں جب کہ زخمیوں میں 183 مرد، 40 خواتین اور 35 بچے شامل ہیں۔

پی ڈی ایم اے کے مطابق گزشتہ 2 روز کے دوران صوبے میں مختلف حادثات میں مزید 5 افراد جاں بحق جبکہ 5 زخمی ہوئے۔ جاں بحق افراد میں 4 بچے اور ایک خاتون شامل ہے جبکہ زخمیوں میں ایک مرد، ایک خاتون اور 3 بچے شامل ہیں۔

رپورٹ کے مطابق مجموعی طور پر 6 گھروں کو نقصان پہنچا ہے، جن میں سے 3 گھروں کو جزوی نقصان پہنچا جبکہ 3 مکمل تباہ ہوئے۔ حادثات پشاور، جنوبی وزیرستان، خیبر اور ایبٹ آباد میں پیش آئے۔

پی ڈی ایم اے نے متاثرہ اضلاع کی انتظامیہ کو امدادی سرگرمیاں مزید تیز کرنے اور متاثرین کو فوری مدد فراہم کرنے کی ہدایت کی ہے۔ ترجمان کے مطابق پی ڈی ایم اے اور تمام متعلقہ ادارے آپس میں مسلسل رابطے میں ہیں اور صورتحال پر نظر رکھے ہوئے ہیں۔

حکام کا کہنا ہے کہ ایمرجنسی آپریشن سنٹر مکمل طور پر فعال ہے اور عوام کو ہدایت کی گئی ہے کہ کسی بھی ناخوشگوار واقعے، موسمی صورتحال یا معلومات کے لیے فری ہیلپ لائن 1700 پر فوری رابطہ کریں۔