اسرائیلی  فوج کی بمباری سے القسام بریگیڈ کے سربراہ ابو عبیدہ شہید،حماس اور اہلخانہ کی تصدیق

غزہ :صہیونی فوج نے بمباری کرتے ہوئےایک حملے میں حماس کے عسکری ونگ القسام بریگیڈز کے ترجمان ابو عبیدہ کو شہید کر دیا، جس کی تصدیق حماس اور ان کے اہلخانہ کے جانب سے کر دی گئی ہے۔

العربیہ کی رپورٹ کے مطابق فلسطینی ذرائع نے بتایا کہ حماس کے عسکری ونگ القسام بریگیڈز کے ترجمان ابو عبیدہ اسرائیلی حملے میں شہید ہو گئے ہیں۔

میٖڈیا رپورٹ کے مطابق اسرائیل نے ایک فلیٹ کو نشانہ بنایا جس میں ابو عبیدہ موجود تھے، اور اس فضائی حملے میں اپارٹمنٹ میں موجود تمام افراد شہید ہو گئے، فلسطینی ذریعے نے مزید کہا کہ ابو عبیدہ کے اہلِ خانہ اور القسام قیادت نے لاش کی شناخت کے بعد ان کی شہادت کی تصدیق کر دی ہے۔

خیال رہے کہ اس سے قبل ہفتے کو اسرائیلی فوج کے ترجمان نے کیا تھا کہ انہوں نے فضائی کارروائی کرتے ہوئے غزہ میں حماس کی ایک نمایاں شخصیت کو نشانہ بنایا ہے۔

اسرائیلی فوج کے ترجمان نے’ایکس‘ پلیٹ فارم پر لکھا تھا کہ غزہ شہر کے شمالی حصے میں حماس کے ایک ’مرکزی رکن‘ پر فضائی حملہ کیا گیا ہے۔

ترجمان اسرائیلی فوج نے مزید بتایا کہ اس کارروائی کا ہدف القسام بریگیڈز کے ترجمان ابو عبیدہ تھے اور ان کے مطابق 95 فی صد امکان ہے کہ یہ کارروائی کامیاب رہی۔

واضح رہے کہ اس سے قبل صہیونی فوجنے  جمعرات کو صنعا میں فضائی حملے میں یمن کے حوثی وزیر اعظم احمد الرحاوی کو بھی نشانہ بنا کر شہید کر دیا ہے، جس پر یمن کے حوثی باغیوں نے اسرائیل سے انتقام لینے کا عہد کیا ہے۔