بیلجیئم فلسطین کو ریاست تسلیم کرے گا، اسرائیل پر 12 پابندیاں عائد کرنے کا اعلان

برسلز / نیویارک: بیلجیئم کے وزیرِ خارجہ میکسم پریوٹ نے اعلان کیا ہے کہ ان کا ملک رواں ماہ ہونے والے اقوامِ متحدہ کی جنرل اسمبلی کے اجلاس کے دوران فلسطین کو بطور ریاست تسلیم کرے گا۔ ساتھ ہی انہوں نے اسرائیل پر 12 سخت پابندیاں عائد کرنے کا بھی عندیہ دیا ہے۔

عرب نشریاتی ادارے الجزیرہ کے مطابق، وزیرِ خارجہ نے سوشل میڈیا پلیٹ فارم ’ایکس‘ (سابقہ ٹوئٹر) پر اپنے پیغام میں کہا کہ بیلجیئم کا یہ اقدام غزہ میں جاری انسانی بحران اور نسل کشی کے پس منظر میں اٹھایا جا رہا ہے۔

اسرائیل پر عائد کی جانے والی مجوزہ پابندیاں:

میکسم پریوٹ کے مطابق ان پابندیوں میں درج ذیل اقدامات شامل ہیں:

مقبوضہ مغربی کنارے کی غیرقانونی اسرائیلی بستیوں سے مصنوعات کی درآمد پر پابندی

اسرائیلی کمپنیوں کے ساتھ حکومتی معاہدوں کا ازسرِنو جائزہ

اسرائیلی اداروں سے دفاعی اور تکنیکی تعاون پر نظرِ ثانی

انہوں نے واضح کیا کہ فلسطین کو باضابطہ تسلیم کرنے کے لیے دو اہم شرائط رکھی گئی ہیں:

تمام اسرائیلی قیدیوں کی رہائی

فلسطینی حکومت میں حماس کا کوئی کردار باقی نہ رہے

فلسطینی ردعمل

فلسطینی وزارتِ خارجہ نے بیلجیئم کے فیصلے کا خیرمقدم کرتے ہوئے اسے بین الاقوامی قانون اور اقوامِ متحدہ کی قراردادوں کے مطابق ایک مثبت قدم قرار دیا۔

فلسطینی بیان میں کہا گیا "ہم اس اقدام کو دو ریاستی حل کے تحفظ، امن کے قیام اور فلسطینی عوام کی جبری بے دخلی و نسل کشی کے خلاف عالمی عزم کے اظہار کے طور پر دیکھتے ہیں۔ ہم دیگر ممالک سے بھی اسی طرز پر فیصلے کی امید رکھتے ہیں۔"

اسرائیلی ردعمل اور داخلی سیاست

اب تک اسرائیلی حکومت نے اس اعلان پر کوئی سرکاری ردعمل جاری نہیں کیا۔ تاہم، اسرائیلی اپوزیشن جماعت یسریئل بیتینو کے سربراہ آویگدور لیبرمین نے کہا کہ:

"بیلجیئم کا فیصلہ وزیراعظم نیتن یاہو کی سفارتی ناکامیوں کا نتیجہ ہے۔ ان کی کمزور قیادت کی وجہ سے آج دنیا فلسطینی ریاست تسلیم کرنے پر آمادہ ہو رہی ہے۔"

عالمی تناظر

بیلجیئم کے خبر رساں ادارے بلگا کے مطابق، وزیراعظم بارٹ ڈی ویور نے گزشتہ ماہ واضح کیا تھا کہ فلسطین کو تسلیم کرنے کا فیصلہ سخت شرائط سے مشروط ہونا چاہیے۔