"مصطفیٰ نواز کھوکھر کی 26ویں آئینی ترمیم کے خلاف سپریم کورٹ میں درخواست

تحریک تحفظ آئین پاکستان کے رہنما مصطفیٰ نواز کھوکھر نے 26ویں آئینی ترمیم کو چیلنج کرتے ہوئے سپریم کورٹ میں درخواست دائر کر دی ہے۔

درخواست میں مؤقف اپنایا گیا ہے کہ پریکٹس اینڈ پروسیجر ایکٹ کی شق 2(2) کے تحت فل کورٹ کی تشکیل کا فیصلہ قانون کے مطابق کیا گیا تھا، اور نہ ہی رجسٹرار اور نہ ہی کوئی اور انتظامی اتھارٹی اس کمیٹی کے فیصلے کو کالعدم قرار دینے کی مجاز ہے۔

درخواست میں مزید کہا گیا ہے کہ چیف جسٹس آف پاکستان کی جانب سے کمیٹی کے فیصلے پر دی گئی وضاحت کو نافذ نہ کرنا قانونی حیثیت نہیں رکھتا، کیونکہ قانون میں کی گئی حالیہ ترامیم آئین و قانون سے ہم آہنگ نہیں ہیں۔

درخواست گزار نے پریکٹس اینڈ پروسیجر کمیٹی کے 31 اکتوبر کے اکثریتی فیصلے پر مکمل عملدرآمد کی درخواست کی ہے، اور کہا ہے کہ اس فیصلے پر عملدرآمد نہ کرنے سے متعلق انتظامی حکم کو کالعدم قرار دیا جائے۔

یہ بات قابلِ ذکر ہے کہ کمیٹی نے 31 اکتوبر کو 26ویں آئینی ترمیم سے متعلق فل کورٹ تشکیل دینے کا فیصلہ کیا تھا۔