سندھ اور پنجاب کے بیراجوں پر پانی کا شدید دباؤ، کئی مقامات پر ریکارڈ ٹوٹ گئے

سندھ حکومت کے قائم کردہ رین اینڈ فلڈ ایمرجنسی مانیٹرنگ سیل نے دریاؤں اور بیراجوں میں پانی کی آمد و اخراج کے تازہ ترین اعداد و شمار جاری کر دیے ہیں۔

محکمہ آبپاشی سندھ کے مطابق گڈو بیراج پر اس وقت اپ اسٹریم میں پانی کی آمد 3 لاکھ 22 ہزار 777 کیوسک جبکہ ڈاؤن اسٹریم میں اخراج 2 لاکھ 95 ہزار 208 کیوسک ریکارڈ کیا گیا ہے۔

اسی طرح، سکھر بیراج پر اپ اسٹریم میں پانی کی آمد 3 لاکھ 23 ہزار 800 کیوسک اور ڈاؤن اسٹریم میں اخراج 2 لاکھ 75 ہزار 850 کیوسک رپورٹ ہوا ہے۔

مزید بتایا گیا ہے کہ کوٹری بیراج پر بہاؤ میں معمولی کمی کے بعد اپ اسٹریم میں پانی کی آمد 2 لاکھ 48 ہزار 686 کیوسک اور اخراج 2 لاکھ 9 ہزار 431 کیوسک ہے۔

محکمہ کے مطابق تریموں اور پنجند پر بھی پانی کی آمد و رفت میں کمی دیکھنے میں آئی ہے۔

تریموں پر مجموعی بہاؤ 2 لاکھ 39 ہزار 745 کیوسک

پنجند اپ اسٹریم میں آمد 1 لاکھ 59 ہزار 32 اور اخراج 1 لاکھ 55 ہزار 62 کیوسک ریکارڈ کیا گیا۔

بیان میں کہا گیا ہے کہ سندھ میں سیلابی صورت حال پر مسلسل نگاہ رکھی جا رہی ہے اور تمام متعلقہ ادارے الرٹ اور مکمل تیار ہیں۔

دریائے ستلج، راوی اور چناب میں انتہائی اونچے درجے کا سیلاب

فلڈ فورکاسٹنگ ڈویژن (FFD) کے مطابق دریائے ستلج میں گنڈا سنگھ والا کے مقام پر پانی کا بہاؤ 3 لاکھ 11 ہزار 673 کیوسک ہے۔

دریائے راوی میں سِدھنائی کے مقام پر 1 لاکھ 58 ہزار 580 کیوسک کا اونچے درجے کا سیلاب جاری ہے۔

دریائے چناب میں:

ہیڈ مرالہ پر 4 لاکھ 92 ہزار 83 کیوسک

خانکی ہیڈورکس پر 5 لاکھ 32 ہزار 834 کیوسک کا بہت اونچے درجے کا سیلاب ریکارڈ ہوا ہے۔

اس کے علاوہ، گڈو بیراج پر 3 لاکھ 54 ہزار 224 کیوسک کے ساتھ درمیانے درجے کا سیلاب نوٹ کیا گیا ہے۔