پاک بحریہ کے تین کموڈورز ریئر ایڈمرل کے عہدے پر ترقی پا گئے

پاک بحریہ کے تین سینئر افسران — کموڈور محمد شاہنواز خان، کموڈور عاصم سہیل ملک اور کموڈور سہیل احمد عزمی — کو ریئر ایڈمرل کے عہدے پر ترقی دے دی گئی ہے۔

ریئر ایڈمرل محمد شاہنواز خان نے 1993 میں سپلائی برانچ میں کمیشن حاصل کیا اور وار کالج لاہور و نیشنل ڈیفنس یونیورسٹی اسلام آباد سے تعلیم حاصل کی۔ وہ مختلف کمانڈ اور اسٹاف عہدوں پر فائز رہے اور اس وقت وزارتِ دفاعی پیداوار میں ڈائریکٹر جنرل میونیشن پروڈکشنز کے طور پر خدمات انجام دے رہے ہیں۔

ریئر ایڈمرل عاصم سہیل ملک نے 1995 میں آپریشنز برانچ میں شمولیت اختیار کی، وہ بنگلادیش، چین اور پاکستان سے اعلیٰ عسکری تعلیم یافتہ ہیں، اور اس وقت نیول ہیڈکوارٹرز اسلام آباد میں DGC4I کے عہدے پر تعینات ہیں۔

ریئر ایڈمرل سہیل احمد عزمی، جنہوں نے 1996 میں کمیشن حاصل کیا، برطانیہ کے رائل نیول کالج سمیت متعدد اداروں سے تربیت یافتہ ہیں، اور اس وقت لاہور میں کمانڈر سینٹرل پنجاب اور کمانڈنٹ نیوی وار کالج کے فرائض سرانجام دے رہے ہیں۔ تینوں افسران کی پیشہ ورانہ خدمات کے اعتراف میں انہیں ستارہ امتیاز (ملٹری) سے نوازا گیا ہے۔