کرکٹڑ حیدر علی کے خلاف تحقیقات فی الوقت بند، شواہد کا تفصیلی جائزہ لیا گیا: مانچسٹر پولیس

پاکستانی کرکٹر حیدر علی کے خلاف مبینہ ریپ کیس میں تحقیقات بند کیے جانے پر گریٹر مانچسٹر پولیس نے اپنا مؤقف جاری کر دیا ہے۔

برطانوی نشریاتی ادارے ’بی بی سی اردو‘ کو دی گئی ایک ای میل میں پولیس کا کہنا تھا کہ "ہم ایسے تمام الزامات کو نہایت سنجیدگی سے لیتے ہیں اور ہر واقعے کا انفرادی طور پر تفصیلی جائزہ لیا جاتا ہے۔"

کرکٹر حیدر علی سے متعلق پوچھے گئے سوال کے جواب میں مانچسٹر پولیس نے بتایا "تمام شواہد کا جامع تجزیہ کرنے کے بعد فی الوقت اس معاملے میں تحقیقات بند کر دی گئی ہیں۔"

تاہم پولیس کا مزید کہنا تھا کہ "اگر مستقبل میں کوئی نئی معلومات سامنے آتی ہیں تو مقدمے اور شواہد کا دوبارہ جائزہ لیا جائے گا۔"

واضح رہے کہ پاکستان کرکٹ بورڈ (پی سی بی) نے 7 اگست کو ایک بیان میں تصدیق کی تھی کہ حیدر علی کو برطانوی پولیس کی تفتیش کے باعث عارضی طور پر معطل کر دیا گیا ہے۔

بعد ازاں، 8 اگست کو خبر رساں ادارے ’رائٹرز‘ نے رپورٹ کیا تھا کہ پاکستانی بلے باز حیدر علی پاکستان شاہینز کے دورۂ انگلینڈ کے دوران مبینہ زیادتی کے الزام کی تفتیش کی زد میں آئے۔