خیبرپختونخوا : رواں سال کے پہلے آٹھ ماہ کے دوران دہشت گردی کے 605 واقعات رپورٹ

خیبرپختونخوا میں رواں سال کے پہلے آٹھ ماہ کے دوران دہشت گردی کے 605 واقعات رپورٹ ہوئے، جن میں 138 عام شہری شہید اور 352 زخمی ہوئے۔

محکمہ انسداد دہشت گردی (سی ٹی ڈی) کی رپورٹ کے مطابق ان واقعات میں مجموعی طور پر 351 ملزمان کو نامزد کیا گیا، 32 دہشت گرد مارے گئے جبکہ 5 کو گرفتار کیا گیا۔ دہشت گردوں سے مقابلوں میں پولیس کو بھی بھاری جانی نقصان اٹھانا پڑا، رواں سال 79 پولیس اہلکار شہید اور 130 زخمی ہوئے۔

صرف اگست کے مہینے میں دہشت گردی کے 129 واقعات پیش آئے جن میں 17 عام شہری شہید اور 51 زخمی ہوئے، جبکہ 13 پولیس اہلکار جان کی بازی ہار گئے اور 46 زخمی ہوئے۔ رپورٹ کے مطابق اگست میں سب سے زیادہ 42 حملے بنوں میں، 15 شمالی وزیرستان، 14 جنوبی وزیرستان، 11 دیر، جبکہ ڈی آئی خان اور کرم میں 8، 8 حملے رپورٹ ہوئے۔

سی ٹی ڈی کے مطابق صرف اگست میں 186 ملزمان کو ان واقعات میں نامزد کیا گیا، جبکہ مقابلوں میں 8 دہشت گرد مارے گئے۔