خدا کا شکر ہے کہ بھارت میں کام کرنے کا موقع ملا ، عاطف اسلم

معروف پاکستانی گلوکار و موسیقار عاطف اسلم نے ایک بھارتی صحافی کو دیے گئے حالیہ انٹرویو میں کہا ہے کہ خدا کے کرم سے انہیں بھارت میں کام کرنے اور شہرت حاصل کرنے کا نادر موقع ملا، جہاں وہ نہ صرف اسٹار بنے بلکہ بولی وڈ کے کئی نمایاں منصوبوں کا حصہ بھی رہے۔

انہوں نے بھارتی گلوکاروں شیکھر روجانی اور متھون کے ساتھ کام کے تجربات کو یاد کرتے ہوئے کہا کہ شیکھر موسیقی اور شاعری دونوں میں مہارت رکھتے ہیں، جبکہ متھون کے ساتھ انہوں نے اپنے کیریئر کے ابتدائی دنوں میں کام کیا، جب دونوں فنکار اپنے اپنے ممالک میں پہچان حاصل کر رہے تھے۔

عاطف اسلم نے اس بات پر بھی خوشی کا اظہار کیا کہ انہیں سلمان خان پر فلمائے گئے متعدد مقبول گانے گانے کا اعزاز حاصل ہوا، جو ان کے کیریئر کے یادگار لمحات میں شامل ہیں۔

موجودہ پاک-بھارت کشیدگی پر بات کرتے ہوئے انہوں نے کہا کہ اگرچہ اس وقت وہ بھارت نہیں جا سکتے، لیکن انہیں وہاں کے مداحوں، ساتھیوں اور کام کے دنوں کی یاد شدت سے آتی ہے۔

انہوں نے تسلیم کیا کہ پاکستانی شوبز انڈسٹری بولی وڈ جتنی بڑی نہیں، اور یہاں "سپر اسٹار" جیسا کوئی واضح تصور موجود نہیں، تاہم خدا کے فضل سے انہیں بولی وڈ جیسے "جنگل" میں اپنی شناخت بنانے اور کامیابی حاصل کرنے کا موقع ملا، جو ان کے لیے ایک اعزاز ہے۔