متاثرین کا اعتماد بحال، ریلیف کی بروقت فراہمی ہماری بڑی کامیابی ہے: وزیراعلیٰ خیبرپختونخوا

وزیراعلیٰ خیبرپختونخوا علی امین گنڈاپور نے کہا ہے کہ سیلاب متاثرہ علاقوں میں بروقت ریلیف کی فراہمی کے نتیجے میں عوام کا صوبائی حکومت پر اعتماد بحال ہوا ہے، جو ان کی حکومت کی ایک بڑی کامیابی اور بہتر طرزِ حکمرانی کا ثبوت ہے۔

یہ بات انہوں نے صوبائی کابینہ کے اجلاس کی صدارت کرتے ہوئے کہی، جس میں سیلاب سے متاثرہ علاقوں میں ریسکیو اور ریلیف آپریشنز کا تفصیلی جائزہ لیا گیا۔

سول انتظامیہ کو خراجِ تحسین

وزیراعلیٰ نے ضلعی انتظامیہ، ریسکیو اداروں اور صوبائی محکموں کی کارکردگی کو سراہتے ہوئے کہا کہ "ملک کی تاریخ میں شاید پہلی بار اتنے کم وقت میں متاثرین کو معاوضے کی ادائیگی ممکن ہوئی ہے۔"

انہوں نے کہا کہ سیلاب سے متاثرہ مال مویشیوں کے نقصانات کا ڈیٹا بھی جمع کیا جا رہا ہے، اور حکومت اس مد میں معاوضہ بڑھانے پر غور کر رہی ہے۔

تباہ شدہ سرکاری املاک کی بحالی

اجلاس میں بتایا گیا کہ سیلاب سے تباہ شدہ سرکاری املاک کا ڈیٹا مکمل کر لیا گیا ہے اور بحالی کا عمل جلد شروع کیا جائے گا۔

افغان زلزلہ متاثرین کے لیے امداد

وزیراعلیٰ نے اجلاس میں کہا کہ "جس طرح ہم سیلاب سے متاثر ہوئے، اسی طرح ہمارے افغان بھائی زلزلے سے متاثر ہوئے ہیں۔ ان کی مدد کرنا ہمارا اخلاقی اور انسانی فرض ہے۔"

انہوں نے بتایا کہ خیبرپختونخوا حکومت کی جانب سے افغان زلزلہ متاثرین کے لیے 35 امدادی ٹرک روانہ کیے جا چکے ہیں، اور حکومت مستقبل میں بھی مزید امداد فراہم کرے گی۔