جلال پور پیر والا میں کشتی الٹنے سے 5 افراد جاں بحق، بچہ لاپتہ، ریسکیو آپریشن جاری

جلال پور پیر والا میں سیلاب متاثرین کے انخلا کے دوران ایک افسوسناک واقعہ پیش آیا جہاں کشتی الٹنے سے 20 سے زائد افراد پانی میں ڈوب گئے، جس کے نتیجے میں ایک خاتون سمیت 5 افراد جاں بحق ہو گئے جبکہ ایک بچہ تاحال لاپتہ ہے۔

ریسکیو 1122 کی ٹیموں نے فوری کارروائی کرتے ہوئے 12 سے زائد افراد کو بحفاظت نکال لیا، تاہم تیز پانی کے بہاؤ کے باعث کشتی عدم توازن کا شکار ہوئی۔ ڈائریکٹر جنرل پی ڈی ایم اے عرفان علی کاٹھیا نے ڈپٹی کمشنر ملتان سے رابطہ کر کے واقعے پر بریفنگ لی اور زخمیوں کو فوری طبی امداد فراہم کرنے سمیت تمام متاثرین کے محفوظ انخلا کو یقینی بنانے کی ہدایت کی۔

ترجمان ریسکیو کے مطابق، اس واقعے میں 3 بچے، ایک خاتون اور ایک مرد جاں بحق ہوئے جبکہ لاپتہ بچے کی تلاش کے لیے ریسکیو آپریشن جاری ہے۔

مزید بتایا گیا کہ اب تک فلڈ آپریشن کے تحت 9 ہزار سے زائد افراد اور 3 لاکھ سے زائد جانوروں کا پیشگی انخلا کیا جا چکا ہے۔ اس سانحے پر وزیراعلیٰ پنجاب مریم نواز شریف نے گہرے دکھ کا اظہار کرتے ہوئے لواحقین سے دلی ہمدردی اور تعزیت کی ہے۔