سیلاب کے مجرم درخت کاٹنے والے ہیں، حکومت ماحولیاتی تباہی کی ذمہ دار ہے: حافظ نعیم الرحمان

اسلام آباد: جماعت اسلامی پاکستان کے امیر حافظ نعیم الرحمان نے کہا ہے کہ حکومت میں شامل عناصر درختوں کی کٹائی میں ملوث ہیں، اور ملک بھر میں سیلابی صورتحال کے اصل مجرم وہی ہیں جو جنگلات کو ختم کر رہے ہیں۔

وہ اسلام آباد میں آبی وسائل کے تحفظ سے متعلق ایک سیمینار سے خطاب کر رہے تھے۔

حافظ نعیم الرحمان کا کہنا تھا کہ "ہم پوائنٹ اسکورنگ نہیں کرتے بلکہ مسائل کا حل تلاش کرنا چاہتے ہیں۔ ہمیں معلوم ہے کہ ہمارے پاس ماہرین کی کمی نہیں، دیانت کی کمی ہے۔"

انہوں نے انکشاف کیا کہ 2017 سے پاکستان کو ارلی وارننگ سسٹم کے لیے قرضے ملنا شروع ہوئے، لیکن حکومتوں نے کوئی مؤثر اقدام نہیں اٹھایا۔
ان کا کہنا تھا کہ ارلی وارننگ سسٹم نہ لگانے کے ذمہ داران کا تعین ہونا چاہیے۔

"درخت ہوں تو کلاؤڈ برسٹ کم ہو سکتا ہے"

انہوں نے مزید کہا کہ اگر پہاڑوں پر درخت موجود ہوں تو درجہ حرارت میں دو ڈگری تک کمی لائی جا سکتی ہے، جو کلاؤڈ برسٹ جیسے شدید موسمی واقعات سے بچاؤ کا سبب بن سکتی ہے۔

"حکومت میں شامل لوگ درختوں کو کاٹ رہے ہیں، اور یہی لوگ ماحولیاتی تباہی اور سیلابی صورتحال کے اصل مجرم ہیں۔"