اسرائیل غزہ کو فلسطین سے الگ کرنا چاہتا ہے، مگر ہم کبھی اپنی زمین نہیں چھوڑیں گے:سپریم فلسطینی جج

فلسطینی صدر کے مشیر اور سپریم جج ڈاکٹر محمود صدیقی الھباش نے کہا ہے کہ اسرائیل فلسطین کی سرزمین پر قبضہ کر کے غزہ کو فلسطین سے علیحدہ کرنے کا منصوبہ بنا رہا ہے، مگر ہم ہر حال میں اس سازش کو ناکام بنائیں گے۔ اسلام آباد میں میڈیا سے گفتگو کرتے ہوئے، اپنے دورہ پاکستان کے دوران انہوں نے کہا کہ اسرائیلی جارحیت کے نتیجے میں غزہ کا 80 فیصد علاقہ، بشمول گھروں، مساجد، اسکولوں، اسپتالوں اور گرجا گھروں کے، تباہ کر دیا گیا ہے۔

گزشتہ دو سال کے دوران 60 ہزار سے زائد فلسطینی شہید اور لاکھوں زخمی ہوئے، جب کہ ہزاروں گھروں کو منہدم کر دیا گیا۔ ڈاکٹر الھباش نے کہا کہ ہم اپنی سرزمین پر قائم ہیں، یہ زمین ہماری ہے اور ہم اسے کبھی نہیں چھوڑیں گے۔ انہوں نے دو ٹوک انداز میں واضح کیا کہ غزہ فلسطین کا اٹوٹ حصہ ہے اور اسے علیحدہ کرنے کی کوئی کوشش کامیاب نہیں ہو سکتی۔ فلسطینی قوم ماضی میں بھی متحد تھی، آج بھی متحد ہے اور مستقبل میں بھی اتحاد قائم رکھے گی۔

انہوں نے اس موقع پر پاکستانی عوام اور حکومت کی فلسطین سے یکجہتی پر شکریہ ادا کیا اور بتایا کہ فلسطینی صدر محمود عباس کے پیغامات صدر مملکت اور وزیراعظم پاکستان کو پہنچا دیے گئے ہیں۔ ڈاکٹر الھباش نے کہا کہ یہ ایک تاریخی دورہ ہے جو دونوں ممالک کے درمیان تعلقات کو مزید مضبوط بنائے گا۔ انہوں نے زور دیا کہ یہ تمام امت مسلمہ کی دینی ذمہ داری ہے کہ فلسطین کی مقدس سرزمین کے دفاع کے لیے یکجہتی کا مظاہرہ کرے۔

آخر میں انہوں نے پاکستانی حکام سے درخواست کی کہ فلسطین کے لیے بھیجی جانے والی امداد کو سرکاری سطح پر منتقل کیا جائے تاکہ اس کی نگرانی اور ریکارڈ کو یقینی بنایا جا سکے۔