شی جن پنگ سے برطانوی وزیرِاعظم کی ملاقات،دو طرفہ تعلقات ،تعاون اور تجارت کو فروغ دینے کا عزم

بیجنگ: برطانیہ کے وزیرِاعظم سر کیئر سٹارمر نے بیجنگ میں چینی صدر شی جن پنگ سے ملاقات کی ہے جس میں دونوں رہنماؤں نے دو طرفہ،تعلقات، باہمی تعاون اور تجارت کو فروغ دینے کا عزم کیا۔

تفصیلات کے مطابق گریٹ ہال آف دی پیپل میں ملاقات میں صدر شی جن پنگ نے کہا کہ دونوں ملکوں کے تعلقات کو قدر کی نگاہ سے دیکھتا ہوں ۔ اچھی چیزیں اکثر وقت اور محنت مانگتی ہیں اور یہ ایک صحیح کام ہے۔ ہمیں طویل مدتی نقطہ نظر اختیار کرنا چاہیے۔اختلافات سے آگے بڑھنا چاہیے اور باہمی احترام کو برقرار رکھنا چاہئے۔

غیر ملکی میڈیا رپورٹس کے مطابق شی جن پنگ سے ملاقات کے دوران برطانوی وزیر اعظم نے چین کو عالمی سطح پر ایک اہم کھلاڑی قرار دیتے ہوئے کہا کہ میں دونوں ممالک کے تعلقات کو مزید آگے بڑھانے کا منتظر ہوں۔

انہوں نے کہا بہت عرصہ ہو گیا ہے جب کسی برطانوی وزیر اعظم نے چین کا دورہ کیا ۔چین کے ساتھ بہتر تعلقات کے معاشی فوائد پر زور دیتے ہوئے سٹارمر نے کہا کہ آج میں یہاں برطانوی عوام کو ذہن میں رکھتے ہوئے موجود ہوں، چین عالمی سطح پر ایک اہم کھلاڑی ہے اور یہ ضروری ہے کہ ہم ایک زیادہ سنجیدہ تعلقات قائم کریں۔

واضح رہے کہ برطانوی وزیر اعظم کیئر سٹارمر 60 کاروباری اور ثقافتی رہنماؤں کے وفد کے ساتھ چین کے دورے پر ہیں۔