بانی پی ٹی آئی بالکل ٹھیک ہیں، تمام قیدیوں کو صحت کی سہولیات میسر ہیں،عطاء اللہ تارڑ کی وضاحت 

اسلام آباد:وفاقی وزیر برائے اطلاعات و نشریات عطاء اللہ تارڑ نے کہا ہے کہ بانی پی ٹی آئی بالکل ٹھیک ہیں، تمام قیدیوں کو صحت کی سہولیات میسر ہیں۔

تفصیلات کے مطابق بانی پی ٹی آئی کی صحت سے متعلق خبروں پر وضاحت جاری کرتے ہوئے وزیرِ اطلاعات نے بتایا کہ ڈاکٹرز نے تجویز کیا تھا کہ بانی پی ٹی آئی کومعمولی طبی کارروائی کیلئے پمز لے جانا ضروری ہے۔

انہوں نے کہا کہ گزشتہ ہفتہ کی رات آنکھوں کے ماہرین کی رائے کے بعد بانی پی ٹی آئی کو پمز ہسپتال لیجایا گیا۔20 منٹ کے معائنے کے بعد بانی پی ٹی آئی کو واپس روانہ کردیا گیا تھا۔

وفاقی وزیر کا کہنا تھا کہ بانی پی ٹی آئی کی تحریری رضا مندی کے بعد تمام کارروائی ہوئی، وہ بالکل تندرست ہیں، ان کی رضا مندی کے بعد ہی واپس اڈیالہ منتقل کر دیا گیا ، ان کا کہنا تھا کہ تمام قیدیوں کو صحت کی سہولیات میسرہیں۔ڈاکٹر جس بھی قیدی کوریفر کرتےہیں جیل انتظامیہ انہیں ہسپتال معائنے کیلئے بھیجتےہیں۔