ماڈل ٹاؤن میں خاوند نے اپنی بیوی کے 3 کروڑ کے طلائی زیورات چوری کر لیے، ملزم گرفتار

لاہور کے علاقے ماڈل ٹاؤن میں ایک ایسا ہی واقعہ پیش آیا جہاں خاوند نے اپنی ہی بیوی کے گھر سے 3 کروڑ روپے مالیت کے 80 تولے طلائی زیورات چوری کر لیے۔ پولیس نے ملزم کو گرفتار کر کے قانونی کارروائی شروع کر دی ہے۔

تفصیلات کے مطابق، دو سال قبل ماڈل ٹاؤن کی رہائشی خاتون کا دیپالپور کے رہائشی فیصل جاوید سے نکاح ہوا تھا۔ خاتون کا کہنا ہے کہ سوشل میڈیا پر دوستی کے بعد ان کی شادی ہوئی اور انہوں نے باقاعدہ ازدواجی زندگی شروع کی۔

خاتون نے بتایا کہ وہ اپنی بہن کے گھر گئی ہوئی تھیں، لیکن جب واپس اپنے گھر پہنچیں تو دیکھا کہ گھر سے 3 کروڑ روپے مالیت کے طلائی زیورات غائب تھے۔ انہوں نے فوری طور پر تھانہ ماڈل ٹاؤن میں 80 تولے طلائی زیورات کی چوری کا مقدمہ درج کرایا۔

پولیس نے تفتیش کا دائرہ ابتدائی طور پر خاندانی افراد تک محدود رکھا اور بعد ازاں خاوند کو شامل تفتیش کیا، جس پر ملزم نے چند گھنٹوں میں جرم کا اعتراف کر لیا۔ پولیس نے ملزم کی نشاندہی پر زیورات گھر سے برآمد کر لیے۔

ملزم کو گرفتار کر کے قانونی کارروائی کا آغاز کر دیا گیا ہے اور مزید تحقیقات جاری ہیں۔