محسن نقوی سے مصافحہ، بھارتی کپتان سوریا کمار یادیو تنقید کی زد میں

ایشیا کپ کی ٹرافی کی رونمائی کے موقع پر بھارتی کپتان سوریا کمار یادیو کا ایشین کرکٹ کونسل (اے سی سی) کے صدر اور پاکستان کے وفاقی وزیر داخلہ محسن نقوی سے مصافحہ کرنا بھارت میں تنازع کا باعث بن گیا۔

ٹرافی تقریب کے دوران سوریا کمار یادیو نے محسن نقوی سے رسمی طور پر ہاتھ ملایا، جسے بھارتی میڈیا نے نمایاں شہ سرخیوں کے ساتھ شائع کیا، اور سوشل میڈیا پر صارفین کی جانب سے شدید تنقید کا طوفان کھڑا ہو گیا۔

بھارتی سوشل میڈیا صارفین کی جانب سے اسے ’’قوم سے غداری‘‘ قرار دیا جا رہا ہے۔ ایک صارف نے لکھا "پاکستان کے وزیر داخلہ سے ہاتھ ملانا شرمناک عمل ہے۔"

ایک اور صارف نے یاد دہانی کروائی کہ محسن نقوی نے "آپریشن سندور" کے بعد بھارت کو سنگین نتائج کی دھمکیاں دی تھیں، اس کے باوجود سوریا کمار کا ان سے مصافحہ حیران کن ہے۔

کئی صارفین نے یہاں تک کہہ دیا کہ بھارتی کپتان کو "اپنے چہرے آئینے میں دیکھنے کی ہمت نہیں ہونی چاہیے۔"

واضح رہے کہ ایشیا کپ جیسے بین الاقوامی ایونٹس میں ایسی رسمی ملاقاتیں اور مصافحے سفارتی آداب کا حصہ ہوتے ہیں، تاہم بھارت میں بڑھتی ہوئی حساسیت اور سیاسی تقسیم کے باعث یہ معاملہ اب خاصی توجہ حاصل کر رہا ہے۔