پاکستان، قطر پر اسرائیلی حملے کے خلاف سلامتی کونسل کا اجلاس بلانے کے لیے متحرک

پاکستان نے الجزائر اور صومالیہ کے ساتھ مل کر اقوام متحدہ میں قرارداد دائر کی، اسحاق ڈار کا کہنا ہے کہ دوحہ پر اسرائیلی جارحیت عالمی امن کے لیے خطرہ ہے۔

پاکستان نے قطر کے دارالحکومت دوحہ پر اسرائیلی حملے کی مذمت کرتے ہوئے، الجزائر اور صومالیہ کے ساتھ مل کر اقوام متحدہ کی سلامتی کونسل کا ہنگامی اجلاس بلانے کی درخواست کردی ہے۔ نائب وزیراعظم اسحاق ڈار نے کہا کہ اسرائیل کی بلااشتعال اور غیرقانونی جارحیت عالمی قوانین کی خلاف ورزی ہے اور اس سنگین معاملے پر عالمی برادری کی فوری توجہ درکار ہے۔

اسرائیلی حملے میں حماس کے رہنما خلیل الحیہ کے بیٹے سمیت 6 افراد شہید ہوئے، جبکہ مرکزی قیادت محفوظ رہی۔ وزیراعظم شہباز شریف نے بھی دوحہ میں اسرائیلی جارحیت کی شدید الفاظ میں مذمت کرتے ہوئے قطر اور فلسطینیوں سے مکمل یکجہتی کا اظہار کیا ہے۔