ایشیاکپ: پاکستان آج اپنا پہلا میچ عمان کے خلاف کھیلے گا

دبئی :ایشیا کپ 2025 میں پاکستانی ٹیم آج اپنی مہم کا آغاز عمان کے خلاف میچ سے کرے گی۔

عمان کیخلاف پاکستان کے میچ کو بھارت کے خلاف اتوار کے بڑے مقابلے سے قبل وارم اپ کے طور پر دیکھا جا رہا ہے۔

اس میچ سے قبل پاکستان کرکٹ ٹیم کے ہیڈ کوچ مائیک ہیسن نے دبئی کی پچ کا معائنہ کیا اور پریس کانفرنس میں اُسے بیٹرز کیلئے سازگار قرار دیا، ہیسن کا کہنا تھا کہ پاکستانی ٹیم میں ملٹی اسکلز کھلاڑی موجود ہیں۔

دوسری جانب عمان کی ٹیم کے کپتان جدیندر سنگھ نے پریس کانفرنس میں کہا کہ پاکستانی ٹیم کا عمان سے کوئی مقابلہ نہیں ہے مگر ٹی 20 فارمیٹ میں کچھ بھی ہوسکتا ہے۔

اُن کا کہنا تھا کہ ایشیا کپ میں بڑی ٹیموں کے خلاف کھیلنا عمان کے لیے ایک موقع ہے۔

خیال رہے کہ ایشیا کپ میں کانٹے دار مقابلے جاری ہے گزشتہ روز کھیلے جانے والے میچ میں بنگلہ دیش نے ہانگ کانگ کو 7 وکٹوں سے شکست دی تھی،جبکہ پاکستان اپنا دوسرا میچ اتوار کو راویتی حریف بھارت کے خلاف کھیلے گا۔