وزیر اعظم اسلامی ممالک کےسربراہی  اجلاس میں شرکت کے لیے قطر پہنچ گئے

اسلام آباد: قطرکےدارالحکومت دوحہ میں عرب اسلامی ممالک کا ہنگامی سربراہی اجلاس آج ہوگا جس کے لیے وزیراعظم شہباز شریف قطر پہنچ گئے۔

وزیر اعظم شہباز شریف قطر کے دارالحکومت دوحہ میں عرب اسلامی سربراہی کانفرنس میں شرکت کریں گے۔

تفصیلات کے مطابق وزیر خارجہ محمد اسحاق ڈار، وفاقی وزیر دفاع خواجہ محمد آصف، وفاقی وزیر اطلاعات و نشریات عطا اللہ تارڑ اور معاون خصوصی سید طارق فاطمی وزیراعظم کے ساتھ وفد میں شامل ہیں۔

واضح رہے کہ اسرائیل کے حملوں کے پیش نظر عرب اور اسلامی ممالک کا اجلاس پاکستان کی معاونت سے ہو رہا ہے، اس سلسلے میں وزرائے خارجہ کا اجلاس گزشتہ روز ہوا جس میں پاکستان نے اسلامی ممالک کی مشترکہ ٹاسک فورس بنانے کی تجویز دی۔

اس حوالے سے  ترجمان دفترخارجہ کا کہنا ہے عرب اسلامی ممالک کا اجلاس اسرائیل کےفضائی حملوں اورفلسطین کی صورتحال پر طلب کیا گیا ہے، جس میں اسلامی تعاون تنظیم کے رکن ممالک کےسربراہان مملکت و حکومت اوراعلیٰ عہدیداران شرکت کریں گے۔

ترجمان نے مزید بتایا کہ اجلاس کی تیاری کے لیے عرب اسلامی ممالک کے وزرائےخارجہ کی نشست ہوئی جس میں پاکستان کی نمائندگی نائب وزیراعظم و وزیر خارجہ اسحاق ڈار نے کی۔

ترجمان کے مطابق پاکستان برادرملک قطر کےساتھ اپنے تعلقات کو انتہائی اہمیت دیتا ہے، قطر اور دیگر ریاستوں کے خلاف اسرائیلی جارحیت کی شدید مذمت کرتےہیں۔