امت مسلمہ کو مشترکہ دفاعی معاہدے کی ضرورت ہے، مولانا فضل الرحمان

جمعیت علمائے اسلام کے سربراہ مولانا فضل الرحمان نے کہا ہے کہ موجودہ حالات کے تناظر میں امت مسلمہ کو ایک متفقہ دفاعی معاہدے کی اشد ضرورت ہے۔

یہ بات انہوں نے قطر کے سفارت خانے کے دورے کے موقع پر کہی، جہاں انہوں نے قطری سفیر علی بن مبارک الخاطر سے ملاقات کی۔

مولانا فضل الرحمان نے قطر پر اسرائیلی جارحیت کی شدید مذمت کرتے ہوئے قطری حکومت اور عوام سے یکجہتی کا اظہار کیا۔ ان کا کہنا تھا کہ عرب اسلامی سربراہی اجلاس کا جلد انعقاد خوش آئند ہے، اور دوحہ کانفرنس اسلامی دنیا کے اتحاد کی بنیاد بن سکتی ہے۔

انہوں نے مزید کہا کہ مسلم دنیا کو درپیش خطرات کے پیش نظر باہمی اتحاد، دفاعی تعاون اور اتفاق رائے ناگزیر ہوچکا ہے۔

اس موقع پر قطری سفیر علی بن مبارک الخاطر نے مولانا فضل الرحمان کا شکریہ ادا کیا اور کہا کہ اسرائیلی حملے کے خلاف پاکستانی قوم کی جانب سے ملنے والی حمایت اور یکجہتی لائق تحسین ہے۔