سپریم کورٹ نے ریٹائرڈ ججز کی بیواؤں کے لیے تا حیات سیکیورٹی کا فیصلہ واپس لے لیا

اسلام آباد :سپریم کورٹ نے ریٹائرڈ ججز کی بیواؤں کو تاحیات سکیورٹی فراہم کرنے کا حکم واپس لے لیا ہے۔ عدالت کی جانب سے جاری وضاحتی بیان میں کہا گیا کہ 2018 کے صدارتی آرڈر نمبر 7 کے تحت صرف ریٹائرڈ ججز کو تاحیات سکیورٹی کا حق حاصل ہے، تاہم یہ سہولت ان کی بیواؤں پر لاگو نہیں ہوتی۔

بیان میں مزید کہا گیا کہ اسی بنیاد پر ریٹائرڈ ججز کی بیواؤں کو دی جانے والی سکیورٹی کا حکم واپس لیا جاتا ہے۔

واضح رہے کہ چند روز قبل سپریم کورٹ کے رجسٹرار نے چیف جسٹس پاکستان کی منظوری سے وزارتِ داخلہ کو ایک خط ارسال کیا تھا۔
 اس خط میں کہا گیا تھا کہ موجودہ سکیورٹی صورتحال کے پیش نظر ہر ریٹائرڈ جج کو تین پولیس اہلکاروں پر مشتمل سکیورٹی فراہم کی جائے۔ 

خط میں یہ ہدایت بھی شامل تھی کہ انتقال کر جانے والے ججز کی بیواؤں کو بھی تین اہلکاروں پر مشتمل سکیورٹی دی جائے تاکہ ان کی حفاظت یقینی بنائی جا سکے۔