ہالی وڈ کے لیجنڈ اداکار اور فلم ساز رابرٹ ریڈفورڈ 89 برس کی عمر میں انتقال کرگئے

یوتاہ : ہالی وڈ کے عظیم اداکار، ہدایت کار اور فلم ساز رابرٹ ریڈفورڈ انتقال کرگئے۔ وہ 89 برس کے تھے۔ ریڈفورڈ اپنے گھر یوتاہ میں نیند کے دوران چل بسے۔ ان کے ترجمان کے مطابق موت کی کوئی مخصوص وجہ بیان نہیں کی گئی۔

پبلسٹی فرم روجرز اینڈ کوون پی ایم کےکی سی ای او سنڈی برگر نے ایک بیان میں کہارابرٹ ریڈفورڈ 16 ستمبر 2025 کو اپنے گھر سنڈینس، یوتاہ کے پہاڑوں میں اپنے چاہنے والوں کے درمیان ہمیشہ کے لیے رخصت ہوگئے۔

ریڈفورڈ نے اپنے فلمی کیریئر کا آغاز 1969 کی سپر ہٹ فلم "بچ کیسیڈی اینڈ دی سنڈینس کِڈ" سے کیا، جس میں انہوں نے پال نیومن کے ساتھ کام کرکے عالمی شہرت حاصل کی۔

20 برس تک اداکاری کے بعد وہ ہدایت کاری کے میدان میں آئے اور 1980 میں فلم "آرڈنری پیپل" پر آسکر ایوارڈ جیتا۔ وہ سنڈینس فلم فیسٹیول کے بانی بھی تھے، جو دنیا بھر کے آزاد فلم سازوں کے لیے ایک نمایاں پلیٹ فارم بن گیا۔

ریڈفورڈ ایک ماحولیاتی کارکن بھی تھے اور یوتاہ کے قدرتی وسائل اور زمین کے تحفظ کے لیے سرگرم رہے۔

چارلس رابرٹ ریڈفورڈ جونیئر 18 اگست 1936 کو سانتا مونیکا، کیلیفورنیا میں پیدا ہوئے۔ ان کے والد اکاؤنٹنٹ تھے۔ پہلی شادی لوئلا وین ویگنن سے ہوئی جس سے ان کے چار بچے ہوئے، تاہم ایک بچہ بچپن میں ہی وفات پا گیا۔ 2009 میں انہوں نے جرمن آرٹسٹ سیبلے زاگارس سے شادی کی۔

ریڈفورڈ کو دنیا بھر میں انگریزی سینما کا بڑا نام سمجھا جاتا تھا۔ 1973 کی فلم "دی اسٹنگ" میں بہترین اداکار کے آسکر کے لیے بھی نامزد ہوئے۔ 2002 میں انہیں لائف ٹائم اچیومنٹ کے اعزاز سے نوازا گیا۔

امریکی گلوکارہ و اداکارہ باربرا اسٹریسینڈ نے ان کے بارے میں کہا تھاکہ رابرٹ ریڈفورڈ کا کام ہمیشہ ان کی شخصیت کی عکاسی کرتا ہے، ایک دانشور، ایک فنکار اور ایک کاوبوائے۔ 

ریڈفورڈ کے فلمی سفر اور سنڈینس فلم فیسٹیول نے سینکڑوں آزاد فلم سازوں کو عالمی سطح پر متعارف کروایا، جن میں کوئنٹن ٹیرینٹینو، اسٹیون سوڈربرگ اور جم جارمش شامل ہیں۔