پارلیمانی کمیٹیوں سے علیحدگی: پی ٹی آئی سینیٹرز نے استعفے دے دیے

اسلام آباد:  پاکستان تحریک انصاف (پی ٹی آئی) کے سینیٹ میں پارلیمانی لیڈر سینیٹر علی ظفر نے اپنی جماعت کے سینیٹرز کے استعفے پارلیمنٹ ہاؤس میں جمع کرا دیے۔
میڈیا سے گفتگو کرتے ہوئے علی ظفر نے کہا کہ پی ٹی آئی سینیٹرز نے قائمہ کمیٹیوں سے مستعفی ہونے کا فیصلہ کیا ہے،انہوں نےکہاکہ استعفوں کے بعد ہم کمیٹی اجلاسوں کا حصہ نہیں ہوں گے۔
سینیٹر علی ظفر کے مطابق اب تک 17 ارکان کے استعفے ان کے پاس پہنچ چکے ہیں، جبکہ کچھ استعفے بعد میں جمع کرائے جائیں گے۔
 انہوں نے بتایا کہ سینیٹر اعظم خان سواتی، مرزا آفریدی، ڈاکٹر زرقا سہروردی، عون عباس بپی، محسن عزیز، فیصل جاوید، مشعال یوسفزئی اور فلک ناز چترالی کے استعفے موصول ہوچکے ہیں۔
اسی طرح فوزیہ ارشد، ڈاکٹر ہمایوں مہمند، نور الحق قادری، ذیشان خانزادہ، علامہ ناصر عباس، دوست محمد خان، روبینہ ناز اور سیف اللہ نیازی نے بھی استعفے جمع کرادیے ہیں۔
علی ظفر نے کہا کہ پارٹی قیادت کی ہدایت کے مطابق یہ استعفے احتجاج کے طور پر دیے جا رہے ہیں۔ ان کا کہنا تھا کہ ہمارے بغیر بھی کمیٹیاں چل سکتی ہیں اور کورم پورا ہوسکتا ہے لیکن ہم نے فیصلہ کرلیا ہے کہ ان کا حصہ نہیں بنیں گے۔ ہم نے فائدہ نقصان نہیں دیکھا، بس پارٹی فیصلے پر عمل کر رہے ہیں۔