توشہ خانہ ٹو کیس :بانی پی ٹی آئی اور اہلیہ بشریٰ بی بی کی بریت کی درخواستیں سماعت کیلئے مقرر

اسلام آباد: توشہ خانہ ٹو کیس میں بانی پی ٹی آئی اور بشریٰ بی بی کی بریت کی درخواستیں سماعت کےلئے مقررہوگئیں۔

تفصیلات کے مطابق اسلام آباد ہائیکورٹ نے درخواستیں 7 اکتوبر کو سماعت کے لئے مقرر کر دیں،جسٹس انعام امین منہاس درخواستوں پر سماعت کریں گے۔

 
 بانی پی ٹی آئی اور بشریٰ بی بی نے توشہ خانہ ٹو کیس کا ٹرائل روکنے کی بھی استدعا کر رکھی ہےجبکہ اس سے قبل جنوری میں بریت کی درخواستیں بھی عدالت میں دائر ہوئی تھیں۔

واضح رہے کہ توشہ خانہ ٹو کیس میں عمران خان اور ان کی اہلیہ پر الزام ہے کہ انہوں نے قیمتی تحائف کے حوالے سے قواعد و ضوابط کی خلاف ورزی کی۔

دوسری جانب درخواست گزاروں کے وکلاء کا موقف ہے کہ مقدمہ بے بنیاد ہے، اس کی سماعت جاری رکھنے کا کوئی قانونی جواز نہیں بنتا۔

عدالتی ذرائع کے مطابق 7 اکتوبر کو فریقین کے وکلاء کو اپنے دلائل پیش کرنے کا موقع دیا جائے گا۔ اگر عدالت نے درخواست منظور کر لی تو بانی پاکستان تحریک انصاف (پی ٹی آئی) اور بشریٰ بی بی کو اس کیس سے بڑا قانونی ریلیف مل سکتا ہے، بصورت دیگر ٹرائل کا عمل دوبارہ تیز ہو جائے گا۔