شہبازشریف آج امریکی صدر ٹرمپ سے وائٹ ہاؤس میں باضابطہ ملاقات کریں گے 

واشنگٹن ڈی سی: وزیر اعظم پاکستان شہباز شریف اور امریکی صدر ڈونلڈ ٹرمپ کے مابین آج وائٹ ہاؤس میں ملاقات ہو گی۔

تفصیلات کے مطابق وزیراعظم کے ساتھ آرمی چیف فیلڈ مارشل سید عاصم منیر اور دیگر حکام بھی ملاقات میں شریک ہونگے۔

دونوں رہنماؤں کے مابین ملاقات میں دوطرفہ تعلقات، تجارت، علاقائی، عالمی امور ، افغانستان، خطے کی صورتحال، انسداد دہشت گردی کے حوالے سے تعاون سمیت مختلف امورپر تبادلہ خیال کیا جائیگا۔

ملاقات کے بعد وزیراعظم جنرل اسمبلی کے اجلاس میں شرکت کے لیے اسی روز واپس نیویارک آ جائیں گے۔ وزیراعظم جمعہ کو جنرل اسمبلی کے اجلاس سے خطاب کرینگے۔

اس سے قبل نیویارک میں اسلامی ممالک کے سربراہی اجلاس کے موقع پر بھی وزیرِاعظم شہباز شریف اور صدر ٹرمپ کے درمیان غیر رسمی ملاقات ہوئی۔ دونوں رہنماؤں نے گرمجوشی سے مصافحہ کیا اور خوشگوار ماحول میں گفتگو کی۔

اس موقع پر امریکی صدر نے نائب وزیراعظم اسحاق ڈار سے بھی مصافحہ کیا اور وزیرِاعظم سے گفتگو کے اختتام پر ‘تھمبز اپ’ کا اشارہ کیا۔

گزشتہ روز اسلامی ممالک کے سربراہی اجلاس کے دوران وزیرِاعظم شہباز شریف نے امیرِ قطر، اردن کے بادشاہ، اور انڈونیشیا اور سری لنکا کے صدور سے بھی ملاقاتیں کیں، جن میں غزہ میں جنگ بندی سمیت دیگر اہم معاملات پر مشاورت کی گئی۔