9 مئی جی ایچ کیو حملہ کیس: بانی پی ٹی آئی کی جانب سے دائر کردہ ٹرائل روکنے کی درخواست مسترد

راولپنڈی: انسداد دہشت گردی عدالت(اے ٹی سی) راولپنڈی نے 9 مئی جی ایچ کیو حملہ کیس کی پاکستان تحریک انصاف( پی ٹی آئی) کے بانی چئیرمین اور سابق وزیر اعظم عمران خان کی جانب سے دائر ٹرائل روکنے کی درخواست مسترد کردی۔

تفصیلات کے مطابق اے ٹی سی راولپنڈی میں 9 مئی جی ایچ کیو حملہ کیس کی سماعت ہوئی ،جس میں عدالت نے 8 گواہان کو دوبارہ طلب کرنے سے متعلق دائر درخواست پر پراسیکیوشن کو نوٹس جاری کردیے جبکہ سماعت کے دوران استغاثہ کے 3 گواہان کی بیانات ریکارڈ کرلیے گئے ہیں۔ 

گواہوں میں ڈی ایس پی اکبر عباس، انسپکٹر عصمت کمال اور انسپکٹر تہذیب الحسن شامل ہیں۔

تاہم بعد ازاں عدالت نےمختصر کارروائی کے بعد 9 مئی جی ایچ کیو حملہ کیس کی سماعت 30 ستمبر تک ملتوی کردی۔ 

خیال رہے کہ 9 مئی جی ایچ کیو حملہ کیس کی سماعت کے دوران عمران خان کی لیگل ٹیم کی جانب سے انسداد دہشت گردی عدالت میں ٹرائل روکنے کی درخواست دائر کی گئی تھی۔

 انسداد دہشت گردی عدالت میں دائر درخواست میں کہا گیا تھا کہ ویڈیو لنک ٹرائل پر لاہور ہائی کورٹ راولپنڈی بینچ کا فیصلہ آنے تک ٹرائل روکا جائے۔