باجوڑ: کھیت میں پرانا گولا پھٹنے سے 4 نوجوان جاں بحق، 2 زخمی

خیبرپختونخوا کے ضلع باجوڑ کی تحصیل ماموند میں ایک افسوسناک واقعہ پیش آیا، جہاں کھیت میں موجود پرانا گولا پھٹنے سے 4 نوجوان جان کی بازی ہار گئے جبکہ 2 دیگر زخمی ہو گئے۔

پولیس کے مطابق تحصیل ماموند میں واقع کھیت میں پرانا مارٹر گولہ موجود تھا، جہاں چند نوجوان کھیلتے ہوئے پہنچے اور نادانستہ طور پر گولے کے ساتھ چھیڑ چھاڑ کرنے لگے۔ اسی دوران گولا زور دار دھماکے سے پھٹ گیا۔

دھماکے کے نتیجے میں 4 نوجوان موقع پر جاں بحق ہو گئے جبکہ 2 زخمی ہوئے، جنہیں فوری طور پر ڈسٹرکٹ ہیڈکوارٹر اسپتال منتقل کر دیا گیا۔

ڈی ایس پی نیاز خان کے مطابق پولیس نے واقعہ کے بعد علاقے کو گھیرے میں لے کر سرچ آپریشن شروع کر دیا ہے تاکہ یہ جانا جا سکے کہ آیا مزید ایسے خطرناک مواد موجود ہیں یا نہیں۔