پشاور ہائیکورٹ کا سرکاری ہسپتالوں کی آؤٹ سورسنگ پر روک کا حکم

پشاور ہائیکورٹ نے خیبرپختونخوا کے سرکاری ہسپتالوں کو آؤٹ سورس کرنے کے حکومتی فیصلے پر عبوری حکم جاری کرتے ہوئے محکمہ صحت کو مزید کارروائی سے روک دیا اور وضاحت طلب کر لی ہے۔

جسٹس اعجاز انور کی سربراہی میں دو رکنی بینچ نے کیس کی سماعت کے دوران استفسار کیا کہ عوامی سہولت کے لیے قائم کیے گئے ہسپتالوں کو نجی شعبے کے حوالے کیوں کیا جا رہا ہے۔

درخواست گزار کے وکیل نے عدالت کو آگاہ کیا کہ تحصیل تخت بھائی کا ہسپتال آؤٹ سورس کیا جا رہا ہے۔ وکیل ہیلتھ فاؤنڈیشن نے مؤقف اختیار کیا کہ آؤٹ سورسنگ کا مقصد صرف نظام میں بہتری لانا ہے، جبکہ عدالت نے ریمارکس دیے کہ اگر محکمہ صحت میں سخت ڈسپلن ہو تو خود بھی بہتری آ سکتی ہے۔ عدالت نے کیس کی سماعت 23 اکتوبر تک ملتوی کر دی۔