عالمی شہرت یافتہ گلوکارعلی ظفر نے ’’کلچرل آئیکون ایوارڈ‘‘ اپنے نام کرلیا

بین الاقوامی شہرت یافتہ گلوکار، اداکار علی ظفر کو نیو یارک پولیس ڈیپارٹمنٹ (NYPD) اور پاکستانی امریکن لاء انفورسمنٹ سوسائٹی (PALS) کی جانب سے "کلچرل آئیکون ایوارڈ" سے نوازا گیا۔ یہ اعزاز نیو یارک سٹی میں منعقدہ سوسائٹی کی دسویں سالگرہ اور اسکالرشپ ایوارڈز ڈنر کی تقریب میں پیش کیا گیا۔

تفصیلات کے مطابق یہ ایوارڈ گلوکار علی ظفر کی بطور ہمہ جہت فنکار خدمات کا اعتراف تھا، جن کی آواز اور وژن نے ایک نسل کی موسیقی کو تشکیل دیا اور جنہوں نے پاکستانی فنون کو عالمی سطح پر اجاگر کرنے میں اہم کردار ادا کیا۔

تقریب میں NYPD کے سینئر حکام، پاکستانی نژاد امریکی کمیونٹی کے اراکین، سفارت کار، اور امریکہ بھر سے ثقافتی نمائندے شریک ہوئے۔

اس موقع پر گلوکار علی ظفر نےاعزاز ملنے  پر شکریہ ادا کرتے ہوئے کہا کہ فن کی طاقت سرحدوں سے ماورا ہو کر دلوں کو جوڑنے کی صلاحیت رکھتی ہے، اور اس طرح کی حوصلہ افزائی انہیں مزید جذبے سے ثقافتوں کے درمیان پل کا کردار ادا کرنے کے لیے موسیقی استعمال کرنے پر آمادہ کرتی ہے۔

علی ظفر فاؤنڈیشن کے ذریعے انہوں نے پاکستان میں تعلیم، سیلاب متاثرین کی بحالی، اور نوجوانوں کو بااختیار بنانے کے کئی منصوبوں کی حمایت کی ہے، جو ان کی انسان دوستی سے وابستہ فنکارانہ شخصیت کو مزید تقویت دیتی ہے۔