تھائی لینڈ نے کمبوڈیا کے ساتھ جنگ بندی کا معاہدہ معطل کر دیا

بنکاک: تھائی لینڈ نے پڑوسی ملک کمبوڈیا کے ساتھ امریکی صدر ڈونلڈ ٹرمپ کی ثالثی میں طے پانے والا امن معاہدہ معطل کر دیا۔

غیر ملکی میڈیا کے مطابق تھائی لینڈ نے بارودی سرنگ دھماکے سے اپنے 2 فوجیوں کے زخمی ہونے کے بعد کمبوڈیا سے امن معاہدہ معطل کر دیا ہے۔

میڈیا رپورٹس کے مطابق تھائی لینڈ کے وزیراعظم انوتین چرنیوراکل نے کہا ہے کہ امن تب تک معطل رہے گا جب تک تھائی لینڈ کے مطالبات تسلیم نہیں کیے جاتے۔

تھائی حکومت نے کمبوڈیا پر الزام عائد کیا ہے کہ اس نے دونوں ممالک کی متنازع سرحدی پٹی پر نئی بارودی سرنگیں بچھائی ہیں۔ حکام کے مطابق پیر کے روز بارودی سرنگ کے دھماکے میں چار تھائی فوجی زخمی ہوئے، جن میں سے ایک کا پاؤں ضائع ہو گیا۔

رائٹرز کے مطابق تھائی حکومت کے ترجمان کا کہنا ہے کہ اگر کمبوڈیا کی جانب سے اس واقعے پر وضاحت اور کارروائی نہ کی گئی تو تھائی لینڈ اس معاہدے کی منسوخی پر غور کرے گا۔

دوسری جانب کمبوڈیا کی وزارتِ دفاع نے نئی بارودی سرنگیں بچھانے کے الزامات کو مسترد کرتے ہوئے کہا کہ تھائی لینڈ کو پرانی جنگی بارودی سرنگوں والے علاقوں میں گشت سے گریز کرنا چاہیے۔

کمبوڈیا نے الزامات کو رد کرتے ہوئے کہا ہے کہ ملک کے سرحدی علاقوں میں اب بھی خانہ جنگی کے دور کی بارودی سرنگیں موجود ہیں، جس کے باعث یہ دنیا کے سب سے زیادہ بارودی سرنگوں سے متاثرہ ممالک میں شمار ہوتا ہے۔

کمبوڈیا کا مؤقف ہے کہ وہ اکتوبر میں طے پانے والے توسیع شدہ جنگ بندی معاہدے کے مطابق تھائی لینڈ کے ساتھ تعاون کے لیے پرعزم ہے۔
واضح رہے اس معاہدے کا مقصد جولائی میں ہونے والی سرحدی جھڑپوں کے بعد پائیدار امن لانا تھا، ان جھڑپوں میں 40 سے زائد افراد ہلاک اور 3 لاکھ سے زیادہ شہری بے گھر ہوئے تھے۔