ترکیہ کا سی 130 فوجی کارگو طیارہ جارجیا میں گر کر تباہ،متعدد افراد جاں بحق

تبلسی: ترکیہ کی فوج کا ایک سی-130 کارگو طیارہ منگل کے روز آذربائیجان اور جارجیا کی سرحد کے قریب گر کر تباہ ہوگیا۔

ترکیہ کی وزارتِ دفاع کے مطابق جارجیا میں گر کر تباہ ہونے والے کارگو طیارے میں عملے کے ارکان سمیت 20 افراد سوار تھے۔

غیر ملکی میڈیا کے مطابق ترک وزارتِ دفاع نے سوشل میڈیا پلیٹ فارم ایکس (سابقہ ٹوئٹر) پر جاری بیان میں کہا کہ طیارہ آذربائیجان سے روانہ ہوا تھا اورترکیہ واپس جا رہا تھا جب حادثہ پیش آیا۔

روپورٹس کے مطابق ترک حکام کا کہنا ہے کہ حادثے کے فوراً بعد آذربائیجان اور جارجیا کی متعلقہ اتھارٹیز کیساتھ مل کرمشترکہ سرچ اینڈ ریسکیو آپریشن شروع کردیا گیا ہے، جائے حادثہ کے قریب امدادی ٹیمیں پہنچ چکی ہیں اورملبے تک رسائی کی کوششیں جاری ہیں۔

وزارتِ دفاع نے کہا کہ حادثے کی وجوہات جاننے کے لیے انکوائری کا آغاز کردیا گیا ہے، طیارے میں فوجی سازوسامان اورعملہ موجود تھا۔

دوسری جانب ترک صدررجیب طیب اورعسکری حکام نے حادثے پر افسوس کا اظہار کرتے ہوئے متاثرہ اہلکاروں کے اہلِ خانہ سے ہمدردی کا اظہارکیا ہے۔