سپریم کورٹ کےسینئر جج جسٹس منصور علی شاہ اور جسٹس اطہر من اللہ نے استعفیٰ دے دیا

اسلام آباد: پاکستان  سپریم کورٹ کے جج  جسٹس منصور علی شاہ اور جسٹس اطہر من اللہ  نے اپنے عہدے سے استعفیٰ  دے دیا ہے۔

تفصیلات کے مطابق سپریم کورٹ کے سینئر جج جسٹس منصور علی شاہ نے 13 صفحات پر مشتمل اپنا استعفیٰ صدر مملکت کو  بھجوا دیا ہے۔

دونوں ججز نے 27 ویں آئینی ترمیم پر تحفظات کا اظہار کرتے ہوئے اپنے استعفے صدر مملکت کو بھجوا دیے۔

استعفی کے بعد دونوں ججز نے سپریم کورٹ میں اپنے چیمبرز خالی کر دیے۔

جسٹس منصور علی شاہ نے 27 ویں آئینی ترمیم پر تحفظات کا اظہار کیا تھا اور اس سلسلے میں چیف جسٹس سپریم کورٹ جسٹس یحییٰ آفریدی کو 2 خطوط بھی لکھے تھے۔

اپنے استعفے میں جسٹس منصور علی شاہ کا کہنا ہےکہ 27 ویں آئینی ترمیم آئین پاکستان پر سنگین حملہ ہے،27 ویں آئینی ترمیم نے سپریم کورٹ آف پاکستان کو ٹکڑے ٹکڑے کردیا ہے۔

جسٹس منصورعلی شاہ نےکہا ہےکہ 27 ویں ترمیم نے عدلیہ کو حکومت کے ماتحت بنادیا ہے۔

خیال رہے کہ اس سے قبل سینیٹ سے 27 ویں آئینی ترمیم منظور ہوگئی تھی، ترمیم کی حمایت میں 64 ووٹ آئے، جبکہ چیئرمین سینیٹ یوسف رضا گیلانی کی زیر صدارت ایوان بالا کے اجلاس میں قومی اسمبلی سے منظور کی گئی 27ویں آئینی ترمیم کی اضافی شقیں منظور کرلی گئی تھیں،جبکہ گزشتہ روز قومی اسمبلی سے بھی 27ویں آئینی ترمیم منظور کی گئی تھی۔

آج صدر مملکت آصف علی زرداری نے 27 ویں آئینی ترمیمی بل پر دستخط کردیے جس کے بعد 27ویں ترمیم آئین کا حصہ بن گئی، صدر مملکت نے وزیراعظم کی ایڈوائس پر آئینی ترمیم پر دستخط کیے ۔