امریکی میرینز نے کراچی میں قونصل خانے پر دھاوا بولنے والے مظاہرین پر فائرنگ کی ،رائٹرز

واشنگٹن ڈی سی: برطانوی خبر رساں ادارے رائٹرز کے مطابق امریکی حکام نے بتایا ہے کہ امریکی میرینز نے کراچی میں قونصل خانے پر دھاوا بولنے والے مظاہرین پر فائرنگ کی تھی۔

امریکی حکام نے ابتدائی معلومات کا حوالہ دیتے ہوئے کہا کہ یہ واضح نہیں کہ میرینز کی جانب سے چلائی گئی گولیاں کسی کو لگیں یا کسی کی ہلاکت کا سبب بنیں، انہیں یہ بھی معلوم نہیں کہ مشن کی حفاظت پر مامور دیگر افراد، جن میں نجی سکیورٹی گارڈز اور مقامی پولیس شامل ہیں، نے بھی فائرنگ کی یا نہیں۔

برطانوی خبر رساں ادارے رائٹرز کے مطابق سفارتی مشن پر طاقت کے استعمال کا یہ ایک غیر معمولی واقعہ ہے، جو ایران کے رہنما کی ہلاکت کے بعد ملک بھر میں جاری مظاہروں کے تناظر میں کشیدگی کو مزید بڑھا سکتا ہے، اس واقعہ میں 10 پاکستانی شہری جاں بحق ہوئے تھے۔

خبر ایجنسی کا کہنا ہے کہ امریکی قونصلیٹ کی حفاظت پر مامور دیگر اہلکاروں میں نجی سکیورٹی گارڈز اور مقامی پولیس شامل ہے،  پولیس حکام نے بتایا گولیاں قونصل خانے کے احاطے کے اندر سے چلائی گئیں۔

دوسری جانب امریکی میرینز نےکراچی قونصل خانے والے معاملے پر سوالات کےجواب امریکی فوج کوبھیج دیے اور امریکی فوج نےکراچی قونصلیٹ والا معاملہ محکمہ خارجہ کے سپرد کر دیا ہے۔تاہم دفتر خارجہ کی جانب سے ابھی تک اس حوالے سے کوئی تفصیلات نہیں فراہم کی گئیں۔