ایران ،اسرائیل کشیدگی کے باعث سونا ایک دفعہ پھر ہزاروں روپے مہنگا،قیمتوں نے ریکارڈتوڑدیے

کراچی: ایران پر اسرائیلی و امریکی حملوں کے بعد مشرق وسطیٰ میں پیدا ہونے والے کشیدگی کے باعث عالمی و مقامی مارکیٹوں میں سونے کی قیمتوں میں ایک دفعہ پھر نمایاں اضافہ ریکارڈ کیا گیا ہے۔

آل پاکستان جیمز اینڈ جیولرز ایسوسی ایشن کے مطابق کاروباری ہفتے کے پہلے روزمقامی صرافہ مارکیٹ میں ایک تولہ سونا 13300 روپے مہنگا ہوگیاجس کے بعد ایک تولہ سونے کی قیمت 5 لاکھ 63 ہزار862 روپے پر پہنچ گئی۔

ایسوسی ایشن کے مطابق اسی طرح دس گرام سونا 11402 روپے مہنگا ہوکر4 لاکھ 83 ہزار420 روپے پر پہنچ گیاہے۔

علاوہ ازاں ایک تولہ چاندی 188 روپے مہنگی ہوکر 10 ہزار 50 روپے پر پہنچ گئی،اس طرح سرمایہ کاروں کی سونے اورچاندی میں سرمایہ کاری ایک بار پھر سے محفوظ رہی ہے۔

دوسری جانب عالمی بلین مارکیٹ میں سونا 133 ڈالر مہنگا ہوکر 5411 ڈالر فی اونس پر پہنچ گیا۔

واضح رہے کہ ہفتے کوبھی سونے اور چاندی کی قیمت میں بڑااضافہ ہوتھاجب عالمی مارکیٹ میں سونا 100 ڈالر مہنگا ہوکر 5278 ڈالر فی اونس پر آگیاتھاجبکہ مقامی صرافہ مارکیٹ میں ایک تولہ سونا 10ہزار روپے مہنگا ہوکر 5 لاکھ 50 ہزار 562 روپے کا ہوگیاتھا۔