ایران نے جوابی حملے تیز کر دیے،پاسداران انقلاب کاشہریوں کواسرائیل چھوڑنے کی وارننگ

تہران: ایران کے پاسدارانِ انقلاب گارڈ (آئی آر جی سی )کا کہنا ہے کہ اسرائیل کے خلاف “عظیم حملوں” کا آغاز کر دیا گیا ہے اور کارروائیاں جاری ہیں،جس کے بعد پاسدارانِ انقلاب نے اسرائیلی شہریوں کو فوری طور پر ملک چھوڑنے کی وارننگ دی ہے۔

ایرانی سرکاری میڈیا کے مطابق پاسداران انقلاب کی جانب سے جاری بیان میں کہا گیا ہے کہ اسرائیلیوں کو فوجی اڈوں، سیکیورٹی مراکز اور سرکاری عمارتوں سے دور رہنا چاہیے کیونکہ یہ مقامات ممکنہ اہداف ہو سکتے ہیں۔

خیال رہے کہ ایرانی فورسز کی جانب سے یہ سخت بیان ایسے وقت میں سامنے آیا ہے جب خطے میں پہلے ہی کشیدگی عروج پر ہے اور دونوں فریقوں کے درمیان جنگ شدت اختیار کر چکی ہے۔

یاد رہے کہ آیت اللہ علی خامنہ ای کی شہادت کے بعد ایران میں انتقام کی علامت سرخ پرچم لہرا دیا گیا تھا جبکہ ان کی شہادت پر ایران کے سیکورٹی چیف علی لاریجانی نے ایکس پر پوسٹ کی تھی کہ صیہونی ریاست اسرائیل اور امریکہ نے ہمارے دلوں کو آگ لگا دی ہے، اب ہم ان کے دل جلا کر راکھ کردیں گے۔