افغان طالبان کے خلاف آپریشن غضب للحق پوری شدت سے جاری،مزید 67 خارجی جہنم واصل

اسلام آباد:افغان طالبان کے خلاف پاک افواج کا آپریشن غضب للحق بھرپور طریقے سے جاری ہے۔

وفاقی وزیر اطلاعات و نشریات عطاء اللہ تارڑ کے مطابق افغان طالبان نے شمالی بلوچستان میں 16 مقامات پر زمینی حملے کئے، افغان طالبان نے زمینی حملے قلعہ سیف اللہ، نوشکی اور چمن اضلاع میں کیے، 25 مقامات پر پاک افواج کے خلاف فائر ریڈ کی کارروائیاں کی گئیں۔

وزیراطلاعات نے تصدیق کی ہے کہ تمام مقامات پر حملوں کو مؤثر طور پر پسپا کر دیا گیا، جس کے نتیجے میں افغان طالبان کے 27 کارندے ہلاک اور متعدد زخمی ہوئے۔ مادرِ وطن کے دفاع میں ایف سی بلوچستان نارتھ کا ایک جوان شہید اور پانچ زخمی ہوئے۔

انہوں نے مزید بتایا کہ خیبرپختونخوا میں طالبان نے ایک مقام پر زمینی حملے کی کوشش کی جبکہ 12 مقامات پر فائر ریڈ کیا گیا، جنہیں بغیر کسی جانی نقصان کے ناکام بنا دیا گیا۔

وزیر اطلاعات کا کہنا تھا کہ خیبر پختونخوا میں رات بھر جاری کارروائیوں کے دوران افغان طالبان کے 40 کارندے ہلاک ہوئے۔