پیپلز پارٹی کے وفد کی وزیر اعظم سے ملاقات،حکومتی قانون سازی پر تحفظات کا اظہار

اسلام آباد:وزیراعظم شہباز شریف سے پاکستان پیپلز پارٹی کے وفد نے پارلیمان میں قانون سازی کے معاملے پر اہم ملاقات کی، جس میں وفد نے حکومتی قانون سازی پر تحفظات کا اظہار کیا ہے۔

پیپلزپارٹی کے وفد میں سینیٹر شیری رحمٰن، راجہ پرویز اشرف، سید نوید قمر اور اعجاز جاکھرانی شامل تھے۔ نائب وزیرِ اعظم سینیٹر اسحاق ڈار، وفاقی وزراء احسن اقبال، اعظم نذیر تارڑ اور مشیر وزیرِ اعظم رانا ثناء اللہ بھی ملاقات میں شریک تھے۔

ذرائع کے مطابق پاکستان پیپلز پارٹی کے وفد کی وزیراعظم شہباز شریف سے اہم ملاقات ہوئی جس میں ملک کی مجموعی سیاسی صورتحال، پارلیمان میں قانون سازی سے متعلق امور زیر غور لائے گئے۔

پاکستان پیپلز پارٹی وفد نے وزیراعظم کو حکومتی قانون سازی پر اپنے تحفظات سے متعلق آگاہ کیا۔وزیراعظم نے حکومتی رہنماؤں کو قانون سازی کے عمل میں اتحادی جماعت کو اعتماد میں لینے کی ہدایات جاری کردیں۔