سپریم کورٹ کے جج جسٹس امین الدین کو آئینی عدالت کا سربراہ بنائے جانے کا امکان

اسلام آباد:پاکستان سپریم کورٹ کے جج جسٹس امین الدین کو وفاقی آئینی عدالت کا سربراہ بنائے جانےکا امکان ہے۔

ذرائع کا کہنا ہے کہ چیف جسٹس یحییٰ خان آفریدی نے جسٹس امین الدین خان کے  اعزاز میں عشائیہ رکھ لیا ہے۔

جسٹس امین الدین خان کے اعزاز میں عشائیہ کل چیف جسٹس ہائوس میں ہوگا۔سپریم کورٹ ججز کو بھی عشائیے میں مدعو کیا گیا ہے۔

واضح رہے جسٹس امین الدین خان نے 30 نومبر کو عہدے سے ریٹائر ہونا تھا۔

یاد رہےکہ 27 ویں آئینی ترمیم کا بل دونوں ایوانوں سے منظور ہو چکا ہے اور صدر مملکت کے دستخط کے بعد یہ بل اب آئین کا حصہ بن گیا ہے۔27ویں آئینی ترمیم کے تحت صدر مملکت وزیراعظم کی ایڈوائس پر وفاقی آئینی عدالت کے ججوں کا تقرر کریں گے۔

آرٹیکل 176 میں کی گئی ترمیم کے مطابق موجودہ چیف جسٹس اپنی مدتِ ملازمت مکمل ہونے تک چیف جسٹس پاکستان کہلائیں گے،اسی طرح آرٹیکل 255 کی شق (2) میں ترمیم کی گئی ہے جو آئندہ چیف جسٹس پاکستان کی تعیناتی کے طریقہ کار سے متعلق ہے۔

ترمیم کے مطابق چیف جسٹس پاکستان وہ ہوگا جو سپریم کورٹ یا وفاقی آئینی عدالت کے چیف جسٹسز میں سب سے سینئر ہو۔

مزید یہ کہ 27ویں آئینی ترمیم کے تحت صدرِ مملکت، وزیراعظم کی سفارش پر وفاقی آئینی عدالت کے ججوں کی تقرری کریں گے۔