چیئرمین جوائنٹ چیفس آف سٹاف کا الوداعی خطاب، افواج کی ہم آہنگی اور مشترکہ حکمت عملی پر زور

راولپنڈی: چیئرمین جوائنٹ چیفس آف سٹاف جنرل ساحر شمشاد مرزا ( نشان امتیاز اور نشان امتیاز ،ملٹری) کے اعزاز میں جوائنٹ سٹاف ہیڈکوارٹر میں تقریب منعقد ہوئی۔

تفصیلات کے مطابق الوداعی خطاب میں جنرل ساحر شمشاد مرزا نے کہا کہ ہمارے ارد گرد کی دنیا ایک ناقابلِ تصور رفتار سے بدل رہی ہے اور اس تبدیلی سے ہماری اندرونی اور بیرونی آزمائشوں پر گہرے اثرات مرتب ہو رہے ہیں، یہ اثرات ہائبرڈ محاذ آرائی سے لے کر جنگ تک محیط ہیں۔

اپنے خطاب میں انہوں نے کہا کہ ان حالات میں ہماری مسلح افواج کو زیادہ ہم آہنگی، مشترکہ تعاون اور یکسو مقصد کے ساتھ تیار رہنا ہوگا۔

جنرل شمشاد مرزا نے مسلح افواج کے درمیان ہم آہنگی اور مشترکہ حکمت عملی کو ایک اہم ضرورت اور مستقبل کے چیلنجز کا سامنا کرنے کے لیے ناگزیر تنظیمی اصلاح قرار دیا۔

انہوں نے زور دیا کہ ایک مکمل بااختیار اور مناسب صلاحیت سے لیس مسلح افواج نظام کے لیے عملی ضرورت ہیں اور افواج کو مربوط حکمت عملی کے تحت مستقبل کی جنگوں کے لیے تیار رہنا ہوگا۔

 جنرل شمشاد مرزا نے تینوں افواج اور جوائنٹ سٹاف ہیڈکوارٹر کے لیے اپنی نیک تمناؤں اور دعاؤں کا بھی اظہار کیا اور کہا کہ یہ ڈھانچہ اپنی نئی ذمہ داریوں کو ایمانداری اور عزم کے ساتھ پورا کرے۔