فخر زمان آئی سی سی کوڈ آف کنڈکٹ کی خلاف ورزی پر سزا یافتہ قرار

دبئی: انٹرنیشنل کرکٹ کونسل(آئی سی سی) نے کوڈ آف کنڈکٹ کی خلاف ورزی کرنے پر پاکستان کے مایہ ناز اوپننگ بلے باز فخر زمان کو سزا سنا دی۔
تفصیلات کے مطابق آئی سی سی کی جانب سے جاری کر دہ اعلامیے میں کہا گیا ہے کہ فخر زمان نے میچ کے اہم مرحلے میں آؤٹ دیئے جانے پرعدم اتفاق کا اظہار کرتے ہوئے ایمپائر سے بحث کی، جو کہ کوڈ آف کنڈکٹ کے آرٹیکل 2.3 کی خلاف ورزی کے زمرے میں آتا ہے۔

آئی سی سی کے مطابق یہ خلاف ورزی لیول ون کی کیٹیگری میں شامل ہے جو کھیل کے دوران نظم و ضبط اور ایمپائرز کے فیصلوں کے احترام سے متعلق ہے۔

اعلامیے کے مطابق فخر زمان کو اس حرکت پر میچ فیس کا دس فیصد جرمانہ عائد کیا گیا ہے جبکہ ان کے ڈسپلنری ریکارڈ میں ایک ڈی میرٹ پوائنٹ بھی شامل کردیا گیا ہے۔

آئی سی سی قوانین کے مطابق دو سال کے اندر چار ڈی میرٹ پوائنٹس جمع ہونے پر کھلاڑی کو ایک میچ کی پابندی کا سامنا کرنا پڑ سکتا ہے۔

خیال رہے کہ یہ واقعہ ٹرائی سریز کے دوران پاکستان اور سری لنکا کے میچ میں اس وقت پیش آیا جب فخر زمان کو ایمپائر نے ایل بی ڈبلیو آؤٹ قراردیا، جس پر انہوں نے فیصلے کو چیلنج کرتے ہوئے سخت لہجے میں اعتراض اٹھایا۔

ایمپائر کی جانب سے رپورٹ کیے جانے کے بعد میچ ریفری نے ثبوتوں کا جائزہ لیا اور سزا کا فیصلہ سنایا۔