پاکستان

ملک میں کورونا کی چوتھی لہر زور پکڑنے لگی ، ایک روز میں 4ہزار سے زائد کیسز رپورٹ

اسلام آباد : پاکستان میں گزشتہ 3 ماہ کے بعد ایک بار پھر کیسزاوراموات میں اضافہ دیکھنے میں آیا ہے ، گزشتہ 24 گھنٹوں کے دوران ملک میں کورونا سے مزید 76افراد انتقال کر گئے جبکہ 4ہزار 497کیسز رپورٹ ہوئے ہیں۔

شائع شدہ 5 years ago پر Jul 29th 2021, 11:52 pm

ویب ڈیسک کے ذریعے

تفصیلات کے مطابق نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق ملک میں اموات کی مجموعی تعداد23 ہزار209ہوگئی ہے،جبکہ متاثرہ افراد کی مجموعی تعداد 9لاکھ37ہزار354ہوگئی ہے ۔

پنجاب

پنجاب میں کورونا مریضوں کی تعداد 3لاکھ 54ہزار 904ہوگئی ۔ جبکہ صوبے میں اب تک 10ہزار 995افراد جان سے ہاتھ دھو بیٹھے ہیں ۔

سندھ

سندھ میں کورونا وائرس سے سب سے زیادہ متاثرہ مریضوں کی تعداد 3 لاکھ74ہزار 434ہو گئی جبکہ صوبے میں اب تک 5 ہزار 903افراد جان کی بازی ہار گئے ۔

خیبرپختون خوا

خیبرپختون خوا میں کورونا وائرس سے متاثرہ مریضوں کی تعدادایک لاکھ 42ہزار799ہوچکی ہے ۔ صوبے میں 4435افراد چل بسے۔

بلوچستان

بلوچستان میں کورونا وائرس کے اب تک 30ہزار019کیسز رپورٹ ہوئے ہیں جبکہ صوبے میں 326مریض چل بسے ۔

اسلام آباد

وفاقی دارالحکومت اسلام آباد میں مجموعی طورپرمتاثرہ افراد کی تعداد86 ہزار602جبکہ اموات کی تعداد797تک جاپہنچی ۔

گلگت بلتستان

گلگت بلتستان میں اب تک 7 ہزار 935افراد کورونا کا شکار ہوئے ہیں جبکہ133افراد جان سے ہاتھ دھو بیٹھے ۔

آزاد کشمیر

آزاد جموں کشمیرمیں کورونا سےمتاثرہ افراد کی تعداد 23ہزار631ہوچکی ہے جبکہ 620افراد جان کی بازی ہار گئے ۔

ملک بھرمیں صحت یاب ہونے والے افراد کی تعداد بھی تیزی سے بڑھنے لگی ہے، این سی اوسی کے مطابق گزشتہ 24گھنٹوں میں 1612 افرادکوروناوائرس کوشکست دےچکے ہیں۔ ملک بھر میں اب تک 9لاکھ37ہزار354مریض کورونا کو شکست دے چکے ہیں ۔

واضح رہے کہ پاکستان میں کورونا وائرس کا پہلا کیس 26 فروری 2020 کو ملک کے سب سے بڑے شہر کراچی میں سامنے آیا تھا ۔