وزیراعلیٰ پنجاب نے فرائض سے غفلت برتنے پر2 افسروں کو عہدوں سے فارغ کردیا

تفصیلات کے مطابق ع وزیر اعلی پنجاب سردار عثمان بزدار نے اپنے دورۂ ملتان کے دوران ملتان ڈیویلپمنٹ اتھارٹی کے ڈائریکٹر جنرل آغا محمد علی عباس کوعہدے سے ہٹا دیا جس کے بعد کمشنر ملتان جاوید اختر محمود کو ملتان ڈیویلپمنٹ اتھارٹی کے ڈی جی کا اضافی چارج دے دیا گیا۔ آغا محمد علی عباس کو سروسز اینڈ جنرل ایڈمنسٹریشن ڈیپارٹمنٹ رپورٹ کرنے کی ہدایت کی گئی ہے ۔ایڈیشنل ایس پی کینٹ ڈویژن ملتان کامران عامر خان کو بھی عہدے سے ہٹا دیا گیا۔ کامران عامر خان کو سی پی او آفس رپورٹ کرنے کی ہدایت  کردی گئی ۔

وزیراعلیٰ پنجاب سردار عثمان بزدار نے کہا کہ کام نہ کرنے والے افسروں کے لئے پنجاب میں کوئی جگہ نہیں،  سرکاری فرائض کی ادائیگی میں کوتاہی قطعا برداشت نہیں کروں گا ۔ان کا کہنا تھا کہ عوام کے مسائل میں غفلت پر کسی سے کوئی رعایت نہیں ہو گی، ملتان کے دورہ کے دوران  فرائض سے غفلت اور عوامی شکایات پر فوری ایکشن لیا ، افسران عوام کی خدمت کو اپنا شعار بنائیں ۔ عوام کی خدمت کرنے والے افسران کی بھرپور حوصلہ افزائی کریں گے۔