وزیراعظم کی زیرصدارت سیاسی و عسکری قیادت کا اجلاس، مشرق وسطیٰ میں کشیدگی سمیت توانائی بحران زیر غور

اسلام آباد: مشرق وسطی میں کشیدہ صورتحال کے متعلق وزیراعظم شہبازشریف کی صدارت میں اہم اجلاس جاری ہے جس میں سیاسی و عسکری قیادت شریک ہے۔

ذرائع کے مطابق اجلاس میں فیلڈ مارشل سید عاصم منیر دیگر سیاسی وعسکری حکام موجود ہیں، اجلاس میں مشرق وسطی میں کشیدہ صورتحال سمیت توانائی بحران ودیگر امورزیرغور ہیں۔

ذرائع کا بتانا ہے کہ مشرق وسطیٰ جنگ کے تصفیے کے لیے پاکستان کی میزبانی سے متعلق بھی بات چیت کی جا رہی ہے جبکہ وزیراعظم شہباز شریف کی آج شام صدر مملکت آصف علی زرداری سے بھی ملاقات متوقع ہے،جس میں امریکا اوراسرائیل کی ایران کی خلاف جنگ،مشرق وسطی کی صورتحال سمیت توانائی بحران پر بات چیت ہوگی۔

ذرائع نے مزید بتایا کہ ملاقات میں موجوہ صورتحال میں حکومتی واتحادی جماعتوں کو اعتماد میں لیاجائے گا، سکیورٹی صورتحال اور پاکستان کے آئندہ کے لائحہ عمل سے متعلق بھی تبادلہ خیال کیاجائے گا۔