سال کی دوسری قومی انسدادِ پولیو مہم کا اعلان، 4 کروڑ 50 لاکھ بچوں کو قطرے پلانے کا ہدف مقرر

اسلام آباد: سال 2026 کی دوسری قومی انسدادِ پولیو مہم ملک بھر میں 13 تا 19 اپریل تک منعقد کی جائے گی۔

نیشنل ای او سی کے مطابق سات روزہ قومی مہم کے دوران تقریباً 4 لاکھ 13 ہزار پولیو ورکرز اپنے فرائض انجام دیں گے۔ مہم کے دوران 4 کروڑ 50 لاکھ سے زائد بچوں کو پولیو سے بچاؤ کے قطرے پلائے جائیں گے جبکہ بچوں کو وٹامن اے کی اضافی خوراک بھی فراہم کی جائے گی۔

پنجاب میں 2 کروڑ 30 لاکھ سے زائد، سندھ میں 1 کروڑ 6 لاکھ سے زائد، خیبر پختونخوا میں 72 لاکھ سے زائد، بلوچستان میں 26 لاکھ سے زائد بچوں کو پولیو کے قطرے پلائے جائیں گے۔

اسی طرح اسلام آباد میں 4 لاکھ 60 ہزار سے زائد، گلگت بلتستان میں 2 لاکھ 28 ہزار سے زائد اور آزاد جموں و کشمیر میں 7 لاکھ 60 ہزار سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔

نیشنل ای او سی نے کہا ہے کہ بچوں کو پولیو سے محفوظ رکھنا ہم سب کی مشترکہ قومی ذمہ داری ہے۔ قوم کے مستقبل کو پولیو سے بچانے کے لیے والدین پولیو ورکرز کے ساتھ بھرپور تعاون کریں اور اپنے 5 سال سے کم عمر بچوں کو پولیو سے بچانے کے لیے انہیں دو قطرے لازمی پلوائیں۔