امریکی حکام کی تحویل سے 11 پاکستانی، 20 ایرانی کارکنوں کی وطن واپسی میں تعاون کی درخواست کی،اسحاق ڈار

اسلام آباد:وزیرِ خارجہ اسحاق ڈار نے سنگاپور کے قریب جہازوں پر پاکستانی اور ایرانی عملے کی بحفاظت واپسی کیلیے سنگاپور کے وزیرِ خارجہ ویوین بالاکرشنن سے ٹیلیفونک رابطہ کیا۔

وزیر خارجہ نے امریکی حکام کی تحویل سے 11 پاکستانی، 20 ایرانی بحری کارکنوں کی وطن واپسی میں تعاون کی درخواست کی۔ امریکا کی جانب سے تحویل میں لیے گئے جہاز اس وقت سنگاپور کے قریب سمندری حدود میں موجود ہیں۔

سوشل میڈیا پلیٹ فارم ’ایکس‘ پرجاری اپنے بیان میںوزیر خارجہ اسحاق ڈار کہا ہے کہ ایرانی وزیرِ خارجہ عباس عراقچی سے بھی اس معاملے پر بات چیت کی ہے اور دونوں ممالک اس صورتِ حال پر قریبی رابطے میں ہیں۔

ایکس پر جاری بیان میں انہوں نے مزید کہا کہ پاکستان ایرانی شہریوں کی پاکستان کے راستے ایران واپسی میں بھی ہر ممکن سہولت فراہم کرنے کے لیے تیار ہے۔

بیان میں اسحاق ڈار نے سنگاپور کے تعاون اور حمایت کو سراہتے ہوئے کہا کہ پاکستانی دفترِ خارجہ اور متعلقہ ادارے امریکی حکام سمیت دیگر فریقین کے ساتھ مسلسل رابطے میں ہیں تاکہ پاکستانی شہریوں کی جلد وطن واپسی کو یقینی بنایا جا سکے۔

یہ پیشرفت حال ہی میں پاکستان کی جانب سے امریکہ کے قبضے میں لیے گئے ایران سے منسلک ایک جہاز کے عملے کی وطن واپسی میں سہولت فراہم کرنے کے بعد سامنے آئی ہے، جبکہ اطلاعات کے مطابق کم از کم 15 ملاح اس ہفتے کے آغاز میں ایران پہنچ چکے ہیں۔دفتر خارجہ نے اس منتقلی کو اعتماد سازی کے جاری اقدامات کا حصہ قرار دیا۔

خیال رہے کہ یہ جہاز ایران شپنگ لائن سے منسلک تھا، 19 اپریل کو خلیج عمان میں ایران کی چابہار بندرگاہ کے قریب امریکی افواج نے روک لیا تھا۔