وزیراعظم کی زیرصدارت وفاقی کابینہ کا اجلاس آج ہو گا

تفصیلات کے مطابق وفاقی کابینہ کے اجلاس کا 15 نکاتی ایجنڈا  جاری کردیا ،   کابینہ   کو مقبوضہ کشمیر میں بھارتی غیر قانونی اقدام سے متعلق 5 اگست کےپروگرام پر بریفنگ دی جائے گی جبکہ وفاقی کابینہ کو کورونا کی وبائی صورتحال پر بھی بریفنگ دی جائے گی ۔ کابینہ کورونا وائرس سے بچاؤ اور علاج کے لیے درکار 61 آئٹمز کی ڈیوٹی چھوٹ میں توسیع کی منظوری دے گی۔

وزیراعظم ہاوس کو کمرشل استعمال کے لیے کھولنے کا معاملہ کابینہ کے ایجنڈے میں شامل  ہے ۔پی ایم ہاوس یونیورسٹی کے بجائے تجارتی، فوڈ ایگزیبیشن سمیت دیگر کاروباری مقصد کے لئے استعمال ہوگاجبکہ  اسلام آباد مارگلہ روڈ پر قائم تجاوزات ہٹائے جانے کی رپورٹ کابینہ کو پیش کی جائے گی۔

اجلاس میں وفاقی کابینہ ممنوعہ اور غیر ممنوعہ بور کے اسلحہ لائسنس جاری کرنے کا اختیار وزارت داخلہ کو دینے کی منظوری دے گی۔وفاقی کابینہ ملزم مجاہد پرویز کو امریکہ کے حوالے کرنے کے معاملے پر غور کرے گی ، آئین کے آرٹیکل 51 کے تحت صوبوں کے لیے مختص نشستوں کا معاملہ بھی کابینہ ایجنڈا میں شامل ہے ۔ وفاقی کابینہ پیسکو کے چیف ایگزیکٹو کی تعیناتی کا فیصلہ کرے گی جبکہ وفاقی کابینہ کو معاشی اعشاریوں پر بریفنگ دی جائے گی۔کابینہ پاکستان سنگل ونڈو کمپنی کے چیف ایگزیکٹو کی تعیناتی کی منظوری دے گی  جبکہ وفاقی کابینہ ای سی سی کے گزشتہ دو اجلاسوں اور قانون سازی کمیٹی کے فیصلوں کی توثیق کرے گی۔